iklan

NASIONÁL, DILI, HEADLINE

OJE 2022: MAPKOMS-SEKOMS ezekuta ona 39,84% iha trimestre daruak

OJE 2022: MAPKOMS-SEKOMS ezekuta ona 39,84% iha trimestre daruak

Osan Dolar Amérika. Imajen/Espesiál

DILI, 18 jullu 2022 (TATOLI)—Diretór Finansa Ministériu Asuntu Parlamentár no Komunikasaun Sosiál (MAPKOMS), Adriano Monterio, informa iha trimestre daruak ne’e MAPKOMS no Sekretária Estadu Komunikasaun Sosiál (SEKOMS) ezekuta ona verba Orsamentu Jerál Estadu (OJE) 2022 atinje ona 39.84%.

“Iha trimestre daruak ne’e MAPKOMS no SEKOMS ezekuta OJE 2022 atinje ona 39,84%, ne’ebé ekivanlente ho totál orsamentu hamutuk $9,066,076.00,” Adriano Monterio hateten ba Ajénsia Tatoli, iha nia knar fatin, Palásiu Governu, Dili.

Hosi montante orsamentu $9,066,076.00 ne’e ezekuta ba kategória lima (5), ne’ebé kompostu hosi saláriu no vensimentu ho nia ezekusaun 40,60% ho nia saldo $942,052.00, bens servisu 56,30% ho nia saldo $3,496,715.00, kapitál menór ho nia ezekusaun 74,23% ho nia saldo $117,487.00, Transferénsia Públika 47,17% ho nia saldo $2,509,822.00.

Kona-ba kapitál dezenvolvimentu, nia informa, ida-ne’e halai liu ba tore nian entaun seidauk ezekuta, maibé daudaun ne’e ninia prosesu atu lori ona ba konkursu públiku iha CNA, entaun lakleur tan sei lansa konkursu hosi CNA, nune’e molok tama ba trimestre ikus ne’e bele ezekuta ona.

Loloos ne’e, nia dehan, iha trimestre daruak lolos ezekusaun atinji 50%, maibé MAPKOMS no Sekretária Estadu Komunikasaun Sosiál (SEKOMS) nia ezekusaun foin atinje to’o 39,84%.

“Iha ida-ne’e, liu-liu ita haree mai iha ami-nia orsamentu en jerál ne’e ita haree mai iha nia pezu kapitál dezenvolvimentu mós osan boot, ida-ne’e kuaze seidauk ezekuta. Ne’ebé kuandu iha item ida mak ita la ezekuta nia bele implika signifikante ba nia persentanjen,” nia dehan.

Ho ida-ne’e, nia espera ba trimestre datoluk mai, OJE 2022 ninia ezekusaun bele tuir tarjetu ne’ebé iha.
“Orsamentu sira-ne’e planeadu hotu ona, entaun ami fiar. Maske ho nia persentajen 39.84% ne’e ba trimestre dahuluk no daruak nian, nune’e molok terseiru no kuatru trimestre, ami fiar katak bele ezekuta tuir target ne’ebé ami iha,” nia afirma.

Notísia Relevante:OJE 2022: MAPKOMS-SEKOMS ezekuta ona 30,82% iha trimestre dahuluk

Jornalista : Nelia Fernandes

Editór : Cancio Ximenes

iklan
iklan

Leave a Reply

iklan
error: Content is protected !!