DILI, 14 jullu 2022 (TATOLI)—Parlamentu Nasionál (PN) liuhosi Komisaun G ne’ebé trata asuntu edukasaun, juventude, kultura no sidadania husu jerasaun foun sira partisipa iha prosesu soru tais, nune’e ba futuru labele lakon.
“Ha’u-nia esperansa mak ne’e, ha’u husu ba ha’u-nia joven sira, liu-liu ha’u-nia oan, alin juventude sira ho sira-ne’ebé sei iha idade atu bele kontribui buat ruma iha ita-nia rai Timor-Leste, se ita ko’alia dehan tais mak ha’u-nia identidade no kultura, ita ko’alia de’it ha’u hanoin la to’o. Maibé, oinsá mak ita-nia ko’alia ne’e bele realiza liuhosi ita-nia esforsu no atividade. Tanba, ita labele ko’alia de’it, maibé ita tenke realiza duni atu buat ne’e sai realidade ida. Entaun, buat ne’e atu sai realidade ita presiza servisu, ita presiza kaer, ita presiza halo atu buat ne’e (tais) bele sai realidade ita-nian,” Vice-Prezidente, Komisaun G, Deputada Josefa Álvares Pereira Soares, hateten ba Ag6encia Tatoli, iha resintu Parlamentu Nasionál (PN), Dili.
Iha parte seluk, oinsá atu kontribui no promove tais ne’ebé hanesan kultura Timor-Leste nian mak joven sira tenke buka aprende atu bele kontribui no promove tais liuhosi soru tais, hodi fó valór ba beiala sira-nia servisu ne’ebé sira uza sira-nia kakutak ne’ebé intelizente tebe-tebes, nune’e bele halo tais ida ba timoroan hotu bele hatais.
“Ida-ne’e mak ha’u hanoin ita tenke fó valór ba ita-nia beiala sira, ne’ebé ho sira-nia hanoin no matenek hodi halo tais ida ba ita to’o ohin loron, ita hatais ho kapas tebr-tebes. Ida-ne’e ita tenke orgullu, tanbasá ha’u-nia avo sira halo ida-ne’e, entaun ita mós buka oinsá atu bele aprende doru tais no promove beibeik,” nia dehan.
Kona-ba juventude sira ladun iha interese ba soru tais, nia dehan, hosi ne’e presiza konvense tanba ne’e líder sira, kuadru polítiku sira, organizasaun feto sira-nia oinsá mak bele konvense joven sira liu-liu feto atu partisipa soru tais.
“Tanba, ita la’os moris de’it ho ema-nian maibé ita mós tenke moris mós ho ita-nian. Iha loron ida ba loron ida, sira mós sei hatene katak ita-nia mós iha valór, dignu perante iha internasionál nia matan. Ne’ebé iha loron ida ba loron ida, sira sei hatene no komprende kona-ba oinsá mak ita bele promove ita-nia patrimóniu rasik,” nia dehan.
Tanba ne’e, nia husu ba komunidade atu oinsá bele prezerva no fó valór ba tais liuhosi soru tais.
“Ha’u hanoin komunidade hotu-hotu tenke buka oinsá bele prezerva, oinsa bele fó valór ba ita- nia tais no oinsá ita mós bele buka dadauk ona hatene oinsá mak ita halo tais. Entaun, komunidade mós labele hanoin de’it katak buat ne’e atu mosu de’it, maibé tenke hatene katak buat ne’e mai hosi kosar been no buat hotu-hotu mai hosi ita-nia kakutak ne’ebé hanoin hodi halo,” nia hateten.
Jornalista : Nelia Fernandes
Editór : Cancio Ximenes
