Postu Viqueque lansa ona programa mão de obra
VIQUEQUE, 18 jullu 2022 (TATOLI)—Administrasaun postu Viqueque vila halo ona lansamentu ba programa mão de obra iha suku Uma-uain kraik no Caraubalo.
“Ami halo ona lansamentu programa mão de obra iha postu Viqueque vila, iha suku Uma-uain iha sesta semana kotuk no ohin dadeer ami halo tan lansamentu iha suku Caraubalo,” Administradór postu Viqueque vila, Duarte Soares Brandão, hateten ba Agência Tatoli, iha postu Viqueque vila, segunda ne’e.
Nia dehan, suku Uma-uain kraik iha grupu haat maka halo serbisu uluk, maibé atividade serbisu maka la hanesan, grupu ida hamoos kampu aviasaun Naeboruk, grupu daruak aterru kampu aviasaun, grupu datoluk halo lutu haleu suku Uma-uain kraik no grupu dahaat hamoos baleta.
“Grupu haat ne’e ho totál traballadór hamutuk na’in-80, ne’ebé kada grupu ida kompostu hosi ema na’in-20. Nune’e mos, iha suku Caraubalo, iha grupu rua maka hahú halo serbisu uluk, grupu ida kuda ai-oan no grupu daruak hamoos baleta iha Viqueque vila laran,” nia akresenta.
Notísia relevante: MAE sosializa matadalan implementasaun PMOPA autoridade sira iha Viqueque
Iha postu Viqueque vila hela suku ualu maka seidauk lansa, maibé iha semana ida-ne’e sei kontinua lansa iha suku ualu ne’ebé seidauk implementa programa mão de obra, ne’ebé traballadór sira sei implementa serbisu kada semana rua,” nia tenik.
Serbisu programa mão de obra sei hahú iha fulan-jullu ne’e no sei finaliza iha novembru tinan ne’e.
“Kada suku sei lansa hotu no ami sei halo monitorizasaun ba kada suku sira to’o programa mão de obra finaliza iha fulan-novembru,” Administradór hato’o.
Nune’e, Autoridade postu ne’e husu ba traballadór sira tenke serbisu ho di’ak no hamoos du’ut iha suku laran sai mós liután.
Implementasaun programa mão de obra iha postu administrativu Viqueque vila, iha ona faze distribuisaun ekipamentu serbisu ba traballadór sira hanesan karaudikur, ai-suak, kanuru, katana, luvas no gerobak hodi fasilita traballadór hala’o serbisu.
Jornalista : Vitorino Lopes da Costa
Editora : Julia Chatarina
