Selebra loron nasionál saúde, MS sensibiliza moras hada’et no la hada’et ba F-FDTL

DILI, 18 jullu 2022 (TATOLI)— Ministériu Saúde (MS), segunda ne’e, hala’o atividade sensibilizasaun informasaun kona-ba moras hada’et no la hadae’t ba membru FALINTIL Forsa Defeza Timor-Leste (F-FDTL).

Tuir planu komemorasaun loron Nasionál Saúde ne’ebé selebra iha loron 22 jullu, bazeia ba rezolusaun Governu númeru 6/2017, 8 fevereiru.

Ho nune’e, Diretora Jerál Prestasaun Saúde iha Ministériu Saúde, Odete da Silva Viegas, hateten sensibilizasaun ne’e hanesan atividade ida ba selebrasaun loron nasionál saúde iha nivél nasionál sei hala’o iha munisípiu Ainaro.

“Ita halo sensibilizasaun ba FALINTIL-Forsa Defeza Timor Leste (F-FDTL) sira para oinsá ita atu hadia estilus moris nian hodi moris ho saudavél,” Diretora Jerál ne’e, hateten ba jornalista sira iha Kuarter Jenerál, Fatuhada.

Nia esplika moras la-hadaet mak hanesan, moras kardiovaskular, hipertensaun no diabetes ne’ebé kauza hosi hosi ema nia hahalok hanesan fuma, hemu tua, ladun halo ezersísiu no la konsumu ai-han nutritivu.  Enkuantu, Moras hada’et mak tuberkoluze, HIV/SIDA, diareia, malaria, dengue no seluk tan

“Númeru moras hadaet dalabarak okupa númeru boot iha ita nia rain hanesan tuberkuloze, HIV/SIDA, diareia, Malaria, dengue, ne’ebé dalabarak afeta ba ema boot nomós labarik, maibé ida ne’e mós kontribui hosi komunidade sira ne’ebé mak moris ho ambiente ne’ebé mak la saudavél,” Odete Viegas afirma.

Nune’e, Ministériu Saúde halo sensibilizasaun ba membru F-FDTL no funsionáriu Ministériu Defeza atu iha koñesimentu kle’an kona-ba moras la hadaet no hadaet hodi hahú muda estilu moris liuliu halo ezersísiu no garante ambiente saudavél hodi prevene-an hosi moras ne’e.

Nia dehan durante ne’e Ministériu Saúde halo transferénsia moras sira ba rai li’ur hanesan nasaun Indonézia, Malázia no Singapura mak moras la hadaet sira.

Iha fatin hanesan, Ministru Defeza, Filomeno Paixão, hato’o agradesementu ba Ministériu Saúde tanba sensibiliza informasaun kona-bá oinsá halo prevensaun ba moras hada’et no la hada’et sira ba Membru F-FDTL no Funsionáriu Ministériu Defeza.

“Hosi sensibilizasaun ida n’e atu muda ita nia hahalok moris hodi para fuma no hemu  tua   atu muda ita nia komportamentu  no prevene-an atu sai membru F-FDTL  ne’ebé  sai forsa saudavel, hodi  prontu serbí Povu no Estadu,” Governante ne’e agradese.

Jornalista : Felicidade Ximenes

Editór         : Florencio Miranda Ximenes