DILI, 18 jullu 2022 (TATOLI)—Sentru Formasaun Fundasaun Hadomi Timor (SFFHT) ho Colégio Maria Regina Guterres (CMRG), domingu (17/07) ne’e, selebra akordu kooperasaun servisu hodi fó formasaun ba joven sira liuhosi área oioin.
“Asina akordu ho Colegio Maria Regina Guteres ne’e ho objetivu prinsipál atu halo atividade ne’ebé mak konjunta, liu-liu ba iha atividade formasaun non-formal nian. Ami mós hanoin atu diversifika tan atividade seluk, maibé neste momentu ami-nia objetivu prinsipál iha akordu ne’ebé mak ohin ami asina, liu-liu oinsá atu bele tau forsa hamutuk para bele kria kondisaun liuhosi formasaun non formál, atu bele ativa fó kapasita ba ita-nia joven sira, aumezmu tempu mós ami atu bele sustenta no garante kontinuasaun fundasaun rua ne’e nian,” Diretór Ezekutivu, Sentru Formasaun Fundasaun Hadomi Timor (SFFHT), Abrão Monteiro, hateten ba jornalista sira, iha Kampung Baru, Comoro, Dili, domingu ne’e.
Formasaun non formál ne’e fó abilidade no kapasitasaun liuhosi mão de obra hanesan ba iha Teknólojia Informátika (IT), língua inglés, lian Korea, portugés no Tekniku Administrasaun Finansa.
“Hosi ne’e, ami-nia promosaun hahú la’o ona, nune’e alvu formasaun semana oin iha 25 hahú ona formasaun,” nia dehan.
Nune’e, akordu ne’e rasik durante tinan ida, maibé sei bele kontinua laiha rohan, depende hosi esforsu agora nian karik servisu fó duni rezultadu di’ak ba juventude no ba nasaun entaun akordu ne’e sei laiha rohan.
Diretór Colegio Maria Regina Guteres, Viriato Mohana Quintas, hateten objetivu hosi selebra akordu ho Sentru Formasaun Fundasaun Hadomi Timor (SFFHT) ne’e atu haforsa liu sustentabilidade organizasaun rua ne’e, liu-liu ba sentru formasaun ne’ebé agora daudaun estabelese, nune’e servisu ba oin ne’e di’akliu hodi fó kapasitasaun ba juventude sira-ne’ebé mak ladauk iha abilidade.
“Nune’e, husu mós ba juventude sira-ne’ebé mak hakarak aprende liután hodi aumenta sira-nia abilidade bele mai iha sentru rua ne’e, liuhosi Sentru Formasaun Fundasaun Hadomi Timor para bele fasilita juventude sira atu bele iha abilidade no língua inklui buat sira seluk ne’ebé ba futuru sei estabelese, liu-liu kapasitasaun ba vokasionál training,” nia hateten.
Formasaun ne’e rejistu ho $5, nune’e iha kada fulan formandu sira tenke selu $15 ba kada área formasaun.
Entretantu, tuir dadús hosi Diretór Ezekutivu, Sentru Formasaun Fundasaun Hadomi Timor (SFFHT), Abrão Monteiro, informa durante ne’e SFFHT fó ona formasaun ba juventude sira hamutuk rihun rua resin, ne’ebé mak tuir formasaun iha área oioin, kompostu hosi lían portugés, inglés, korea, teknólojia informátika (IT), arsitéktura, administrasaun finansas, enjinária sívil no seluk tán.
Jornalista : Nelia Fernandes
Editór : Cancio Ximenes
