VIQUEQUE, 19 jullu 2022 (TATOLI)–Diretór Servisu Diresaun Nasionál Transporte Terreste (DNTT) munisípiu Viqueque, Elvino da Cruz, relata, hahú fulan-janeiru to’o juñu 2022 rekolla ona taxa hamutuk $ 21.382,50.
“Taxa ne’ebé ami rekolla ba tipu haat hanesan inspesaun, troka naran, karta kondusaun, no lisensa transporte públiku. Ami-nia kompeténsia atu buka reseita ba Estadu, maibé dezafiu ne’ebé ami hasoru maka to’o agora ami laiha edifísiu própriu hodi garante funsionáriu sira-nia serbisu no garante sistema jestaun atendimentu ba komunidade iha munisípiu Viqueque,” Diretór informa ba Agência Tatoli, iha ninia knaar fatin, Beloi, tersa ne’e.
Notísia relevante: DNTT Viqueque hatama reseita $36.450 ba kofre Estadu iha tinan 2021
Funsionáriu ne’ebé serbisu iha DNTT Viqueque hamutuk ema na’in-15, kompostu hosi permanente ida no kontratadu 14, ne’ebé sai hanesan forsa traballu.
Tuir dadus, janeiru iha inspesaun 374 ho reseita hamutuk $3.820, lisensa 17 ho resita $305, karta kondusaun neen ho reseita $110, rejistu 55 ho reseita $575, nune’e totál hamutuk $4.810.
Fevereiru iha inspesaun 363 ho reseita $3.265, lisensa 18 ho reseita $290, karta kondusaun ualu ho reseita $150, rejistu 67 ho reseita $695, totál hamutuk $4.400.
Marsu iha inspesaun 295 ho reseita $2.930, lisensa 24 ho reseita $640, karta kondusaun sia ho reseita hamutuk $145, rejistu 61 ho reseita $675, totál hamutuk $4.390.
Abríl iha inspesaun 158 ho reseita $1.745, lisensa hitu ho reseita $120, karta kondusaun neen ho reseita $100, rejistu 37 ho reseita $427,50, totál hamutuk $2.392.
Maiu iha inspesaun 132 ho reseita $1.485, lisensa lima ho reseita $75, karta kondusaun 14 ho reseita $280, rejistu 36 ho reseita $510, totál hamutuk $2.350.
Juñu iha inspesaun 246 ho reseita $2.245, lisensa 16 ho reseita $295, karta kondusaun sia ho reseita $180, rejistu 33 ho reseita $320, totál hamutuk $3.040.
Jornalista : Vitorino Lopes da Costa
Editora : Julia Chatarina
