Top

FRETILIN husu Governu solusiona estudante timoroan nia pasaporte ne’ebé kaduka

Pasaporte Repúblika Demokratika Timor-Leste (RDTL). Imajen/Espesiál

DILI, 19 jullu 2022 (TATOLI)—Deputada bankada Fretilin iha Parlamentu Nasionál, Maria Angelica Rangel, husu Governu liuhosi Ministériu Justisa (MJ) atu solusiona estudante timoroan sira iha diáspora ne’ebé sira-nia pasaporte kaduka.

Notísia Relevante: Komisaun G husu Governu solusiona estudante nia pasaporte ne’ebé kaduka

“Sira-nia passaporte mate ona iha Vietaname, Portugál, Korea, Malásia iha fatin sira-ne’ebé mak ita-nia oan sira ba eskola iha ne’eba,” Deputada Maria Angelica Rangel levanta kestaun ne’e liuhosi reuniaun plenária komisaun permanente iha Parlamentu Nasionál, segunda ne’e.

Preokupasaun ne’e simu hosi estudante timoroan sira-ne’ebé oras ne’e daudaun hala’o sira-nia estudu iha diáspora katak ho pandemia COVID-19 ne’ebé mundu tomak enfrenta halo sira labele halo movimentu fila mai Timor-Leste hodi renova pasaporte, nune’e presiza hetan atendimentu hosi Governu.

“Ministéiru Justisa atu haruka ema reprezentante na’in-rua ka tolu ho mákina sira-ne’e atu renova fali ita-nia oan sira-nia pasaporte sira-ne’ebé mate ka akduka,” nia husu.

Deputada hosi bankada Governu ne’e hateten, antes ne’e iha aprovasaun orsamentu retifiktivu preokupasaun refere levanta ona hosi deputadu lubun no konfirma ho Ministru Justisa hato’o pedidu ba Ministériu Finansa (MF) hodi bele aloka verba ruma atende ba situasaun ne’e.

“Ministéiru Justisa hato’o pedidu ba Ministéiru Finansa hodi husu verba ruma hosi dotasaun todo Governu ne’ebé Parlamentu Nasionál tau mós osan fundu kontijénsia iha ne’eba atu prevee ba situasaun previstu sira-ne’e, maibé defaktu katak proposta ne’ebé mai hosi MJ ne’e MF rekuza tanba la’ós situasaun previstu,” nia dehan,

Timor-Leste tau osan iha fundu kontijénsia atende situasaun sira previstu hanesan mós estudante timoroan sira hasoru, tanba pasaporte mak mate iha rai-li’ur.

Nune’e, kestaun ne’e hato’o hela ba SEKOMS atu tau matan hodi hatutan ba Primeiru-Ministru nune’e bainhira iha reuniaun Konsellu Ministru haree situasaun previstu hato’o ba Ministru Justisa no Ministru Finansa tanba osan iha fundu kontijénsia iha.

Hatán ba kestaun ne’e, Governu liuhosi Sekretáriu Estadu Komunikasaun Sosiál (SEKOMS), Merício Juvinal Akara, hateten nia-parte rejista hela no sei hato’o ba ministériu kompetente.

Jornalista : Nelson de Sousa

Editór      : Cancio Ximenes

Publisidade

Leave a Reply

Latest Post

error: Content is protected !!