OÉ-CUSSE, 19 jullu 2022 (TATOLI) – Ministru ba Asuntu Parlamentár no Komunikasaun Sosiál (MAPKomS), Francisco Martins Jerónimo, tersa ne’e halo vizita ofisiál hodi avalia konstrusaun ba infraestrutura saúde sira, ne’ebé autoridade Rejiaun Administrativa Espesiál Oé-Cusse Ambeno (RAEOA) harii ona iha rejiaun ne’e.
“Ida-ne’e parte ami-nia serbisu atu nune’e bele monitoriza no akompaña prosesu infraestrutura saúde ne’ebé maka la’o iha RAEOA, tanba tempu ne’ebá orsamentu ba COVID-19, entaun ami mai haree no halo avaliasaun katak prosesu la’o kapaas, ha’u hanoin iha futuru ita-bele iha kondisaun, atu tau ita-nia pasiente sira ho dignu,” Francisco Martins Jerónimo, hateten, iha klínika TBC Sakatu, suku Nipani.
Governante ne’e hatutan, iha futuru kuandu uma sira-ne’e kompletu sei benefísia ba Atoni-oan sira, liuliu ba pasiente sira-ne’ebé ho moras kontajioza nian, no moras seluk tanba autoridade agora prepara ona fasilidade ne’ebé integradu tebes.
Iha vizita ofisiál dahuluk, hahú iha sentru saúde Pante Makasar lokaliza iha aldeia Sanane, suku Costa, no kontinua ba iha projetu konstrusaun edifísiu armazenamentu ai-moruk, konstrui iha bairru Horta, daudaun ne’e atinje ona 70%, ne’ebé ezekuta hosi empreza, Fitun Sanane Unip. Lda, ho valór kontratu $427,615.95, ho durasaun serbisu fulan-haat.
Nune’e mós kontinua ba iha projetu konstrusaun edifísiu izolamentu, ho nia progresu serbisu atinje 68%, konstrusaun ne’e ezekuta hosi empreza Erihjocia Unip. Lda, ho valór kontratu $288,082.66, ho durasaun serbisu fulan-haat.
Nune’e mós vizita ofisiál ba projetu konstrusaun edifísiu banku de sangue no laboratóriu ne’ebé atinje ona 68%. Projetu ne’e ezekuta hosi empreza Dinhola Unip. Lda, ho valór kontratu $210,742.43, ho durasaun serbisu fulan haat.
Kontinua ba iha projetu konstrusaun sala izolamentu Unidade Kuidadu Intensivu (ICU), progresu servisu foin atinje 30%, konstrusaun ne’e ezekuta hosi empreza Zero Quatro Lifau Unip.Lda, ho valór rihun $200-resin.
Ikusliu iha konstrusaun klínika izolamentu ba TBC ne’ebé lokaliza iha suku Nipani, sub-rejiaun Pante Makasar, ne’ebé ezekuta hosi empreza Tafen Kuan Unipesoál Lda, ho valór kontratu $154,551.69.
Nune’e Sekretáriu Rejionál ba Asuntu Saúde, Manuel da Costa, informa, orsamentu hirak-ne’e prevee hosi fundu COVID-19, balu uza konstrusaun kuarentena ne’ebé konstrui iha sub-rejiaun haat, Oésilo, Pássabe, Nítibe no Pante Makasar.
Jornalista : Abílio Elo Nini
Editór : Evaristo Soares Martins
