MS-MD asina akordu kapasita membru F-FDTL iha área medisina
DILI,19 jullu 2022 (TATOLI)— Ministra Saúde (MS), Odete Maria Freitas Belo ho Ministru Defeza, Brigadeiru Jenerál Filomeno da Paixão de Jesus, tersa ne’e, asina Memorandum Entendimentu atu kapasita membru FALINTIL-Forsa Defeza Timor-Leste (F-FDTL) iha área espesialidade medisina.
“Akordu ne’e hanesan akordu dahuluk entre Ministériu Saúde ho Ministériu Defeza nian oinsá atu halo kapasitasaun rekursu umanu iha área espeslsializasaun medisina,” Ministra Saúde hateten iha ámbitu asina akordu iha kuartél Jenerál-F-FDTL-Fatuhada-Dili, tersa ne’e.
Ho nune’e, Ministériu Saúde ho Ministériu Defeza estabelese kooperasaun entre parte rua iha dezenvolvementu rekursu umanu iha área saúde. Tuir planu iha tinan ne’e sei haruka uluk médiku na’in-rua iha área internista ho kardiolójia ba nasaun Kuba.
Iha tinan 2023 haruka tan na’in-haat, hanesan na’in-rua iha área sirurjia rua no na’in-rua seluk iha área espesializasa anasteziaba nasaun Fiji. Enkuantu iha tinan 2023 sei haruka tan jestaun ospitál na’in-ida, psikolójia na’in-ida, tékniku aliadu na’in-12 bá nasaun Indonézia.
“Tanba ne’e, serimónia asina akordu entre MS ho MD akontese iha tempu ne’ebé loos no oprtunu atu bele iha tempu badak sira bele asesu ba universidade sira iha rai li’ur ne’ebé estabelese ona akordu ho MS,” nia afirma.
Ministériu Saúde nafatin iha planu atu kontinua kapasita profisionál saúde sira. liuliu iha área espesiálista hodi bele hadi’ak di’ak liu prestasaun kuidadu saúde sekundária no tersiaria hodi hadi’ak saúde populasaun Timor-Leste.
Nune’e, Ministériu Saúde hahú estabelese kooperasaun ho Nasaun hirak mak hanesan; Kuba, Xína, Fiji, Papua New Guinea, Indonézia, no seluk tan iha área dezenvolvementu kapasitasaun Profesionál Saúde.
Kooperasaun ho Nasaun Kuba hahú kedas depois Timor-Leste ukun rasik-an iha tinan 2004 no to’o agora liuhusi akordu purvolta médiku jerál ne’ebé gradua ona hamutuk 921.
Alende ne’e, iha médiku espesialista na’in-74 iha área oin-oin ne’ebé distribui ona iha ospitál referénsia no HNGV, maibé númeru hirak ne’e seidauk sufisiente atu bele hala’o prestasaun kuidadu saúde sekundária ho tersiaria iha Timor-Leste.
Iha biban hanesan, Ministru Defeza (MD), Brigadeiru Jenerál Filomeno da Paixão de Jesus, hateten Ministériu Defeza no Ministériu Saúde asina akordu ida ne’e hodi hametin kooperasaun liuliu iha área edukasaun atu kapasita membru F-FDTL iha área espesializada médiku nian.
“Ita-nia membru F-FDTL ne’ebé profisaun sai hanesan médiku espesialista ne’ebé estuda iha Kuba no balun kursu iha rai laran hamutuk 10-resin, maibé ho akordu ida ne’e atu iha kursu ruma husi rai li’ur no rai laran sira bele ba partisipa,” Governante ne’e afirma.
Jornalista : Felicidade Ximenes
Editór : Florencio Miranda Ximenes
