MS-UNFPA kapasita pesoál saúde hodi atende pasiente iha situasaun emerjénsia
DILI,19 jullu 2022 (TATOLI)—Ministériu Saúde (MS) ho Fundu Populasaun Organizasaun Nasaun Unida (UNFPA) fó formasaun ba profisionál saúde atu fó atendementu di’ak ba pasiente sira iha situasaun emerjénsia.
Profisionál saúde ne’ebé tuir formasaun ne’e mai hosi Hospitál Nasionál Guido Valadares (HNGV), Hospitál Referál Baucau, Sentru Saúde Ermera, Manatuto, Viqueque, Manufahi, no Ainaro.
“Objetivu husi formasaun ne’e atu eleva pesoál saúde sira nia kapasidade iha nivél hotu-hotu hanesan iha nivel ospitál to’o sentru saúde, nune’e bele halo atendimentu ne’ebé di’ak ba pasiente liga iha situasaun emerjénsia hanesan dezastre naturál no mosu krize ruma,”Xefe Departamentu Juventude iha Ministériu Saúde, Silvino Amaral, hateten ba jornalista sira bainhira ramata semináriu orientasaun pakote servisu inisiál minimu (PSIM) iha Timor Plaza, tersa ne’e.
Tanba, nia dehan mosu situasaun emerjénsia mak komunidade sira tenke halo dezlokasaun hosi sira nia hela fatin ba fatin ne’ebé seguru, nune’e profisionál saúde sira tenke halo preparasaun di’ak hodi fó atendimentu imediatu.
“Ita presiza tebes halo preparasaun di’ak liga ba iha nesesidade oinsá atu atende ita nia komunidade ho di’ak liuliu ba saúde reprodutivu sira,” Silvino Amaral informa.
Iha fatin hanesan, Reprezentante Adjunta Interina UNFPA iha Timor Leste, Domingas Bernardo, afirma UNFPA hanesan ajénsia ONU ida atu haree ba iha saúde reprodutiva no saúde maternál nian.
“Iha situasuan emerjénsia servisu minimu ba pakote saúde reprodutiva ka saúde inan-nian tenke iha atubele atende inan sira ne’ebé , mak iha sentru evakuasaun ka iha sira nia uma rasik, labele asesu ba servisu saúde ka fasilidade saúde sira,” nia afirma.
Tanba ne’e, nia dehan UNFPA hamutuk ho MS kapasita profisionál saúde hodi hasa’e sira nia-abilidade oinsá asegura ekipamentu atu ajuda sira servisu iha situasaun emerjénsia nia laran. Domingas afirma.
Jornalista: Felicidade Ximenes
Editór : Florencio Miranda Ximenes
