Top

PN husu Governu fasilita BI ba idozú-EhD iha postu administrativu

Plenária Parlamentu Nasionál. Imajen TATOLI/António Gonçalves.

DILI, 19 jullu 2022 (TATOLI)—Deputadu hosi bankada Fretilin iha Parlamentu Nasionál, Dario Madeira, husu Ministéiru Justisa hosi Dirasaun Nasionál Servisu Rejistu Notariadu atu lori atendimentu to’o postu administrativu hodi fasilita idozú no ho ema ho defisiénsia (EhD) hodi trata Billete Identidade (BI).

“Rekomenda ba Governu karik emisaun sertidaun RDTL ho Billete Identidade ne’e tenke ba to’o iha postu nune’e iha suku sira bele mai asesu iha nivél postu administrativu de’it tanba kondisaun estrada territóriu la permite ba ita-nia inan aman sira ne’ebé idade avansadu ona ho defisiente sira labele transporta to’o mai munisípiu ne’e defisíl tebes,” Deputadu Dario Madeira, levanta iha reuniaun plenária komisaun permanente iha Parlamentu Nasionál, segunda ne’e.

Deputadu hosi bankada Governu ne’e, simu komunidade nia preokupasaun nune’e parte relevante bele tau konsiderasaun lori besik atendimentu iha nivél postu administrativu hodi fasilita di’ak liután, tanba bainhira dokumentu sira hanesan sertidaun RDTL no BI sai kriteira mós ba idozú ho ema ho defisiénsia sira atu hetan direitu subsídiu.

“Ha’u hakarak ko’alia kona-ba emisaun sertidaun RDTL ho Billete Identidade liga ba ho idozú sira tanba iha idozú barak atu simu osan maibé sira laiha sertidaun RDTL ho BI, entaun  difikulta tebes sira labele simu sira-nia direitu no até sira-nia naran mós xefe suku no xefe aldeia aprezenta laiha nafatin lista benefisiáriu,” nia dehan.

Deputada CNRT, Maria Barreto, hateten programa Governu ne’ebé hamosu tan fali kriteriu bainhira idozú no ema ho defisiénsia sira atu simu sira-nia subsídiu presiza iha sira-nia BI, entaun halo ema barak tenke forma anruk hodi halo no hein sira-nia BI.

“Entaun realidade ne’ebé mak akontese kuaze iha munisípiu hotu hanesan. Idozú, ema ho defisiénsia no inan isin rua hetan bolsa da mãe jerasaun foun tenke ba antrian iha rejistu notariadu, nia situasaun mak ne’e Governu halo programa ida-ne’e ejize benefisiáriu sira atu hetan maibé la kria kondisaun. Entaun situasaun ne’ebé akontese katak ferik ho katuas, ema ho defisiénsia no inan isin-rua balun dudu malu iha notariadu lori oras ba oras atu hetan BI,” nia hateten.

Yamna ne’e, nia sujere presiza kria kondisaun nune’e ho kondisaun ne’ebé konfortavel bainhira asesu ba fatin administrasaun públiku liu-liu iha servisu notariadu iha munispál sira.

Hatán ba preokupasaun hosi Deputadu sira-nian, Governu liu hosi Sekretáriu Estadu Komunikasaun Sosiál (SEKOMS), Merício Juvinal Akara, nia-parte rejista hela no sei enkamiña ba ministéiru tutela hodi bele fó resposta iha tempu tuir mai.

Jornalista : Nelson de Sousa

Editór       : Cancio Ximenes

 

Publisidade

Leave a Reply

Latest Post

error: Content is protected !!