DILI, 19 jullu 2022 (TATOLI)— Polisia Nasionál Timor-Leste (PNTL) munisípiu Viqueque hamutuk ho Serbisu Informasaun Polisia (SIP), tersa ne’e detein ona suspeitu ho naran inisiál AS (tinan 34), ne’ebé taa pasajeiru FpN iha área Uatame, postu Uatulari, munisípiu Viqueque.
“Suspeitu AS PNTL no SIP detein hafoin rekolla informasaun hosi família vitima inklui sasin sira. Nune’e komunika kedas mai Forsa Rezerva no Eskuadra PNTL Uatulari, hodi halo detensaun ba suspeitu refere,” refere nota ne’ebé Agência TATOLI asesu, tersa ne’e.
Tuir kronolójia ne’ebé PNTL rekolla, vitima FPN hetan taa hosi suspeitu AS, iha loron segunda (18/7), tuku 1:57, madrugda, bainhira vítima halo viajen ho karreta angguna ida bá diresaun suku Uatame , postu adminitrativu Uatulari, munisípiu Viqueque.
Iha viajen, suspeitu na’in-toli falun oin metin hamrik iha dalan, no vitima FPN nuudar motorista husu sira atu ba ne’ebé, suspeitu hakbesik mai iha karreta no hateke tama iha kareta laran la sa’e karreta.
“Bainhira karreta arranka suspeitu AS hasai sasan kroat lansa taa husi kotuk hodi rezulta vítima nia liman sorin parte loos kanek grave no suspeitu halai tama tiha iha nú laran. Nune’e vitima no pasajeiru sira iha karreta laran la koiñese suspeitu, tanba kalan no sira falun oin metin,” nota esplika.
Nune’e, kondutór ne’e halai lalais kedas ba Eskuadra PNTL hodi transporta kedas vitima ba halo kurativu iha sentru saúde Uaitame, hodi hetan tratamentu saúde no vítima husu atu PNTL investiga kle’an kazu ne’e.
Entretantu, Suspeitu nia kaben deklara, nia la’en AS taa FPN tanba tenta atu hapara karreta hodi sa’e hamutuk tanba karreta la para, nune’e AS lansa kedas taa ba vitima FPN no iha kalan nia kaben ka suspeitu AS toba la dukur.
Daudaun ekipa konjunta entrega ona suspeitu AS ba Esquadra PNTL Uatulari hodi kontinua halo identifikasaun no investigasaun ligadu ho kazu tentativa omisídiu ne’e.
Jornalista: Natalino Costa
Editór : Florencio Miranda Ximenes
