VIQUEQUE, 19 jullu 2022 (TATOLI)–Diretór Sentru Solidaridade munisípiu Viqueque, Paulo Menezes, informa, progresu konstrusaun edifísiu iha Raitahu, postu administrativu Viqueque vila daudaun atinje ona 16%.
“Progresu konstrusaun edifísiu foun Sentru Solidaridade munisípiu Viqueque daudaun serbisu la’o hela no atinje ona 16%, nune’e parte empreza sei kontinua hala’o konstrusaun no ita mós haree iha mudansa klimátika hanesan udan hela de’it. Ida-ne’e sai impaktu ba serbisu konstrusaun edifísiu,” Diretór hateten Agência Tatoli, iha ninia knaar fatin, postu Viqueque vila, tersa ne’e.
Notísia relevante: Benefisiáriu bolsa da mãe atuál rejistu iha MSSI hamutuk 45.836
Foin lalais udan kuaze fulan-rua, halo empreza lM Caicasa Metin Unip. LDA, ne’ebé toma-konta konstrusaun labele halo serbisu.
“Kontratatu ba konstrusaun edifísiu ho durasaun fulan-neen, maibé kondisaun udan entaun kuaze fulan-rua sira labele halo serbisu, nune’e ami halo relatóriu ba nasionál hodi extende kontratu serbisu,” nia akresenta.
Nune’e, nia husu empreza banhira kahur rai henek no semente tenki tuir Bill of Quantity (BoQ), nune’e bele garante kualidade konstrusaun.
“Ha’u mós ba ko’alia ho empreza iha terrenu hodi husu empreza aumenta traballadór hodi aselera serbisu konstrusaun tuir tempu ne’ebé determina,” nia tenik.
Númeru konstrusaun 01/MSSI/DGAF/DNA/I/2022 ho tipu projetu konstrusaun edifisiu foun, ho totál orsamentu hamutuk $805.366,41, hahú iha loron 06 janeiru 2022 no sei ramata iha loron 30 setemebru tinan ne’e.
Jornalista : Vitorino Lopes da Costa
Editora : Julia Chatarina
