VIQUEQUE, 20 jullu 2022 (TATOLI)—Bee Timor Leste, Empreza Públika (BTL, E.P) munisípiu Viqueque rekolla ona reseita hamutuk $1.585 durante fulan-neen hodi hatama ba kofre Estadu.
“Daudaun ne’e ami konsege rekolla taxa liuhosi metru kontadór ne’ebé instala ona ba kada uma-kain hamutuk unidade 27, iha parte zona 1 Beloi. Taxa ne’ebé ita-nia komunidade voluntáriu selu hamutuk $1.585,” Diretór Servisu BTL, E.P, Marito da Costa, informa ba Agência Tatoli, iha ninia knaar fatin, Beloi, kuarta ne’e.
Notísia relevante: Transforma ba BTL,E.P, pesoál DNAS Viqueque na’in-ualu hili funsionáriu públiku
Tuir Diretór, daudaun postu Viqueque vila hahú selu taxa no kada fulan uma-kain ida selu $5.
“Kona-ba prosesu dada bee-moos, dahuluk uma-kain sira tenke mai halo rejistu iha edifísiu no selu administrasaun tuir medida kanu, metade selu $55, kanu medida ¾ $100, hafoin ekipa tékniku BTL, E.P ba halo levantamentu hodi oferese kanu metru neen ba kliente sira no mós ekipamentu seluk, maibé liu metru neen kliente sira maka prepara rasik,” nia akresenta.
Daudaun BTL, E.P Viqueque kria tan planu atu alarga tan sistema kanalizasaun ba zona ualu tanba durante ne’e komunidade sira depende liu ba kanu transmisaun.
“Ami mós planu atu kria tan sistema kanalizasaun ba zona ualu tanba durante ne’e ita-nia komunidade depende liu ba kanu transmisaun. Entaun, ami tenki halo melloramentu atu sira hetan ligasaun ketak ba ita-nia kanu boot,” nia tenik.
Aleinde ne’e, BTL.EP daudaun expande tan ba postu haat hanesan Ossu, Lacluta, Uatulari no Uatucarbau, ne’ebé sei faze konkursu dada bee-moos.
Jornalista : Vitorino Lopes da Costa
Editora : Julia Chatarina
