DAS Bobonaro distribui ona kaixaun 80 ba postu administrativu haat
BOBONARO, 20 jullu 2022 (TATOLI) – Xefe Departamentu Asaun Sosiál (DAS) Munisípiu Bobonaro, Amilcar Tavares, fó-sai katak, iha tinan ida ne’e distribui ona kaixaun hamutuk 80 ba postu administrativu haat atu apoia ba família matebian.
Nia haktuir, postu administrativu haat ne’ebé mak hetan ona ditribuisaun kaixaun ne’e mak hanesan Atabae, Balibo, Cailaco, Bobonaro, la inklui postu administrativu Maliana tanba iha kedas kapitál munisípiu.
Amilcar hatutan, iha tinan lima ba kotuk bainhira komunidade mate família sira sempre husu apoia ba iha Sentru Solidariedade Sosiál no Inkluzaun atu hetan distribuisaun kaixaun, maibé iha tinan ne’e serbisu hirak-ne’e entegraba Diresaun Asaun Sosiál ne’ebé foin estabelese hodi toma konta ba serbisu refere inklui carro funerario
“Ami distribui ona kaixa hamutuk 80, kada postu sei hetan kaixaun 20, agora kaixaun balu hotu ona hanesan iha Balibo foin lalais komunidade mate, mai foti fali iha munisípiu ita fasilita, maibé postu sira hato’o pedidu mai ita ditribui kedas ba para ajuda ita-nia komunidade sira,” nia informa ba Jornalista sira, iha kna’ar-fatin, tersa ne’e
Nia dehan, hosi postu administrativu lima ne’e, iha postu Lolotoe de’it mak to’o agora seidauk asesu tanba akontese kodisaun klima la di’ak, difukulta kompañia fornesedór tula kaixaun to’o Lolotoe vila.
“Kaixaun atu lori ba Lolotoe ne’e estoke iha hela, kompañia ne’ebé produz mós ita halo ona pagamentu, só ké transporte atu tula kondisaun estrada ne’e mak la favorese, maibé ami garante tempu badak sei distribui, ha’u la promete, ita hein de’it klima di’ak mak lori ba,” nia hateten.
Nia akresenta, ba família matebian ne’ebé atu hetan apoia kaixaun tenke liuhosi prosedimentu sira hanesan,hasai deklarasaun hosi suku, aneksu ho kartaun eleitorál no identidade seluk hosi matebian, inklui família nia kartaun eleitorál.
Enkuantu ba labarik kiik ne’ebé mate presiza de’it familia nia kartaun eleitorál no indetidade sira seluk.
“Ita produs kaisa modelu rua, ema kiik nian ida ho boot nian ida, sé kuandu ba labarik kiik-oan, familia tenke hakerek kedas iha deklarasaun suku ne’e katak matebian ne’e labarik kiik, ita bele fasilita malu iha kualkér fatin, iha dalan-ninin de’it mós bele, tanba ami atende 24 oras,” nia subliña.
Daudaun ne’e Diresaun Asaun Sosiál iha Carro Funerario hamutuk tolu mak durante ne’e halo operasaun hodi tula mate-isin hosi kapitál Maliana ba postu administrativu sira to’o suku, aldeia iha munisípiu ne’e.
Maibé provizoriu iha karreta rua de’it mak funsiona tanba ida avaria hela, tanba ne’e iha tinan ne’e autoridade munisípiu Bobonaro prevee tán orsamentu hodi sosa tán carro funerario foun ida, ne’ebé tuir planu sei to’o iha fulan-agostu nia laran.
“Carro funerario ne’e ita sei halo atendimentu 24 oras, la haree ba oras serbisu, importante pasa informasaun de’it mai, ami prontu fasilita komunidade iha suku 50 ho nia aldeia 193 no moos ba komunidade sira iha munisípiu sira seluk ne’ebé presiza,” nia hateten.
Entretantu totál orsamentu ne’ebé Diresaun Asaun Sosiál munisípiu Bobonaro gasta atu produs kaixaun iha tinan ida ne’e rihun $35 hodi sosa kada kaixa ho folin $190.
Jornalista : Sérgio da Cruz
Editór : Evaristo Soares Martins
