iklan

EDUKASAUN, HEADLINE

Estudante finalista 3.296 iha Viqueque sei partisipa ezame nasionál

Estudante finalista 3.296 iha Viqueque sei partisipa ezame nasionál

Ilustrasaun ezame. Imajen/Espesiál

DILI, 25 jullu 2022 (TATOLI)–Estudante finalista hamutuk na’in-3.296 iha munisípiu Viqueque sei partisipa iha ezame nasionál, ne’ebé tuir kalendáriu hosi Ministériu Edukasaun Juventude no Desportu (MEJD) sei realiza iha loron 24 outubru 2022.

“Ami rekolla ona dadus estudante finalista sira no daudaun hein de’it atu submete mai nasionál hodi halo verifikasaun,” Diretór Servisu Edukasaun munisípiu Viqueque, Emídio Amaral, informa ba Agência Tatoli, via telefónika, segunda ne’e.

Notísia relevante: Estudante finalista Viqueque na’in-3.583 partisipa ezame nasionál ohin

Estudante finalista 3.296 kompostu hosi Eskola Ensinu Báziku Sentrál (EBC, sigla portugés) 1.897, Eskola Ensinu Sekundáriu Jerál (ESJ) 1.306, no Eskola Ensinu Sekundáriu Tékniku Vokasionál (ESTV) 93.

“Ami seidauk submete dadus estudante sira ba nasionál, maibé kuandu dadus sira tama hotu ona sira sei relata. Portantu situasaun no kondisaun eskola sira iha Viqueque la’o di’ak inklui fasilidade sira. Ita iha Viqueque laiha problema ho fasilidade eskola. Ha’u bele garante katak ezame nasionál agora ne’e estudante sira sei partisipa ho di’ak,” nia akresenta.

Totál dadus estudante finalista tinan ne’e iha territóriu nasionál ne’ebé atu partisipa iha ezame nasionál to’o agora seidauk tama kompletu iha edukasaun nasionál, tanba ne’e MEJD seidauk relata informasaun ba públiku.

Jornalista   : Tomé Amado       

Editora        : Julia Chatarina

iklan
iklan

Leave a Reply

iklan
error: Content is protected !!