DILI, 20 jullu 2022 (TATOLI) – Polísia nasionál Timor-Leste (PNTL), Eskuadra munisípiu Dili, postu administrativu Cristo rei, suku Bidau Sant’Ana oferese formasaun ba membru organizasaun arte marsiál na’in 31 husi Ikatan Kera Sakti (IKS), Persaudaraan Setia Hati Terate (PSHT) no Kmanek Oan Rai Klaran (KORKA) iha Sede suku Bidau Sant’Ana, kuarta ne’e.
Objetivu prinsípal husi formasaun ne’e atu fó hanoin nafatin membru arte marsiál sira hodi kria pás no estabilidade iha sira ninia hela fatin.
“Fó-hanoin fila fali sira kona-ba sira-nia lala’ok atu halo fila fali treinamentu ne’ebé durante ne’e Guvernu suspende; tempu naruk. agora reativa fila fali para persyaratan (rekizitu) ne’ebé KRAM fó ba sira (Arte marsiál, red) para kompleta depois mak sira loke treinu. Bainhira lakompleta sira labele loke,” Komandante Polísia Postu administrativu Cristo Rei, Inspetór polísia, Duarte Abilio, ba Tatoli, ohin.
Autoridade polisiál ne’e informa, iha formasaun ne’e, grupu arte marsiál sira mós aprezenta sira-nia dokumentu.
“Sira rasik aprezenta sira-nia dokumentu husi prezidenti KRAM hato’o mai formatu para sira atu priense. Balun mós seidauk kompletu i balun kompletu ona hela de’it suku atu fó-autorizasaun ba sira atu loke treinu”.
Komandante Polísia Postu administrativu Cristo Rei ne’e mós relata katak juventude sira iha Bidau Sant’Ana ne’e sai ezemplár di’ak ida ba juventude sira seluk.
“Iha suku Bidau Sant’Ana ne’e, ita iha suku ida, aldeia haat. Sira iha IKS, PSHT no mós KORKA. Sira-nia situasaun nafatin, sei la’o hakmatek. Sira hanesan juventude ida di’ak ba iha futuru no nasaun ida ne’e,” nia konsidera.
Komandante ne’e rekoñese, haree husi parte seguransa Cristo rei, grupu arte marsiál tolu ne’e hatudu maturidade di’ak hodi koopera ho seguransa, autoridade lokál no komunidade. “Durante ne’e sira hakmatek”.
Tanba ne’e, membru PNTL ne’e, husu ba joven sira atu nafatin kria pás no estabilidade iha rai-laran, respeita-malu, atu mantein pás no moris ne’ebé di’ak iha ida-idak ninia hela fatin. “Husu ba grupu arte marsiál tolu, nafatin respeitu regra ne’ebé husi Estadu, Guvernu ho mós prezidenti KRAM” tenki respeita regra ne’e”.
Nia hatutan: “Treinu, maibé ho di’ak respeitu komunidade ne’ebé mak besik iha fatin treinu nian. Tenki-ser kolabora nafatin, asegura nafatin, situasaun ne’ebé ita iha suku, aldeia ou liu-liu ba iha Postu Administrativu Cristo Rei ne’e la’o ho di’ak”.
“Husu ba iha komunidade tomak liu-liu ba iha grupu tolu arte marsiál hanesan IKS, PSHT, KORKA, halo kooperasaun. Karik mosu buat ruma iha suku, aldeia, ne’e tuur hamutuk para rezolve tuir kakutak malirin,” nia sujere.
Entretantu, formasaun ne’e hala’o durante loron ida, partisipa alende membru grupu arte marsiál sira, inklui mós membru PNTL no mós autoridade lokál sira.
Notísia relevante:Kompromisu dame: arte marsiál labele hamosu problema iha futuru
Jornalista: José Belarmino de Sá
Editór: Rafy Belo
