iklan

EDUKASAUN, HEADLINE

Língua indijena neen Timor-Leste ameasadu atu lakon

Língua indijena neen Timor-Leste ameasadu atu lakon

Diretór DNPC, Gil Paulino dos S. Oliveira

DILI, 19 jullu 2022 (TATOLI) – Diresaun nasionál patrimóniu kultura (DNPC, sigla inglés), Sekretáriu Estadu arte no kultura (SEAK) identifika ona lian indijena Timor-Leste ne’ebé mak ameasadu atu lakon mak hanesan lian Makuva (Iha Lospalos), Atauran, Adabe, Nanaek, Isni, no Lolein.

Diretór DNPC, Gil Paulino dos S. Oliveira informa katak Governu koopera ho UNESCO (Organizasaun nasaun unida ba edukasaun, siénsia no kultura (UNESCO, sigla inglés) Timor-Leste hodi halo levantamentu dadus iha parte Baucau, Lautem no Viqueque hodi hamoris hikas lian ne’ebé mak ameasa atu lakon.

“Ami mós serbisu hamutuk ho Komisaun Nasionál UNESCO Timor-Leste, i sira mós halo levantamentu hodi hola parte ba planu sira atu hamoris fila-fali língua ne’e,” Ezekutivu DNPC, SEAK, informa ba Tatoli iha nia knaar fatin, Praia dos Coqueiros-Dili, tersa ne’e.

Tuir ezekutivu ne’e, lian indijena sira ne’e kategória tama iha lista ameasada tanba numéru falante kada lian indijena hirak ne’e menus husi 1.000.

“Ezemplu lian indijena Makuva nu’udar liña Austronézia ne’ebé mak sai lian indijena ba komunidade iha Fataluku,” nia fó-ezemplu.

Tuir dadus sensus 2010, sei iha komunidade na’in 56 iha Tutuala mak sei bele uza lian refere (Makuva) iha sira-nia komunikasaun diária.  Lian indijena seluk ne’ebé mak numéru falante ki’ik mak hanesan Atauran (falante 147), Adabe (Falante 181), Nanaek (Falante 297), Isni, (Falante 703), no Lolein (Falante 1,130).

Numéru falante lian indijena Timor-Leste, tuir sensus 2010 mós hatudu katak Lian indijena mai husi lian Austronézia: Baikenu (Falante 62,201), Bekais (Falante 3,887), Galoli/Galolen (Falante 13,066), Habun (falante 2,741), Idate (falante 13,512), Isni (Falante 703), Kairui (falante 5,993), Kemak (falante 61,969), Lakalei (falante 3,250), Lolein (falante 1,130), Makuva (falante 56), Mambae (Falante 131,361), Midiki (falante 9,586), Nanaek (falante 297), Naueti (Falante 15,045), Tetun Terik (falante 63,519), Tokodede (falante 39,483), and Waima’a (falante 18,467).

Enkuantu lian lokál ne’ebé mai husi lian Papua mak hanesan: Bunak (falante 55,837), Fataluku (falante 37,779), Makalero (falante 7,802), Makasae (falante 101,854) no Sa’ani (Falante 4,763).

Iha mós diáletu neen (6) iha illa Ataúru mak hanesan Adabe (falante 181), Atauran (falante 147), Dadu’a (falante 3,146), Rahesuk (falante 1,015), Raklungu (falante 2,220) no Resuk (falante 1,691).

Entretantu, tuir estudu ne’ebé mak hala’o husi akadémiku Chatarina William-Van Klinken no Rob Williams iha tinan 2015 hatudu katak iha língua nativa Timor-Leste 18 no mós iha língua lima mak klasifikadu nu’udar língua Papua no  indijena neen seluk ko’alia iha illa Ataúro.

Tuir UNESCO, 43% husi lian indijena 6.000 iha mundu mak agora dadaun kategória iha lista atu lakon.

Ho nune’e, tuir rezolusaun Nasaun Unida (Resolution A/RES/74/135) proklama ona periódu 2022 no 2032 nu’udar dékade internasionál hodi mobiliza entidade no rekurusu sira atu halo prezervasaun, revitalizasaun no promosaun ba lian indijena hirak ne’ebé mak ameasadu atu lakon.

Antes ne’e, Sekretáriu ezekutivu KNTLU (Komisaun nasionál Timor-Leste ba UNESCO), Francisco Barreto hateten, Timor-Leste presiza estabelese Sentru nasionál diversidade linguístika (SNL) hodi bele prezerva no proteje di’ak liutánlíngua indijena sira ne’ebé sei lakon.

Jornalista: Filomeno Martins

Editór: Rafy Belo

iklan
iklan

Leave a Reply

iklan
error: Content is protected !!