OJE 2022: HNGV ezekuta ona 37% iha janeiru to’o juñu
DILI, 20 jullu 2022 (TATOLI)—Diretór Administrasaun Finansa no Lojístika iha Hospitál Nasionál Guido Valadares (HNGV), Raul Humberto Gama, informa ezekusaun Orsamentu Jerál Estadu (OJE) 2022 atinje ona 37%, ne’ebé ekivalente ho $4.133.223,75.
Orsamentu tinan fiskál 2022, alokadu ba Hospitál Nasionál Guido Valadares hamutuk $11.170.875,00, ne’ebé fahe ba kategoria saláriu no vensimentu $5.921.132, bens no servisu $915.956, kapitál menór 500.000 no kapitál dezenvolviemntu $599.787.
“Hosi janeiru mai to’o 30 juñu, ita ezekuta ona 37%,” Diretór ne’e hateten ba Agência TATOLI iha nia knaar fatin HNGV-Bidau, kuarta ne’e.
Hosi totál ezekusaun $4.133.223,75 ne’e barak liu gasta ba sálariu no vesimentu millaun $2,8, bens no servisu ne’e gasta ona millaun $1,1 no kapitál menór ezekuta $59.897.
“Kapitál dezenvolvimentu mak seidauk ezekuta tanba projetu hotu-hotu sei iha prosesu aprovizionamentu no verifikasaun inklui projetu reabilita balun hala’o ona hanesan fatin hemodialize, maibé seidauk halo pagamentu,” nia afirma.
Entertantu, tuir dadus hosi portál transpáransia ne’ebé agência TATOLI asesu hosi janeiru mai too 20 jullu 2022 hosi orsamentu alokadu $11.170.875, 00 ezekuzaun atinje ona 50,0%. Hanesan komprimisiu sira $1,247,086,29, obrigasaun sira $521,452,61, atuál $5,066,129,57 no saldo $4,336,206,53.
Jornalista : Felicidade Ximenes
Editór : Florencio Miranda Ximenes
