iklan

COVALIMA, SAÚDE

Pesoál saúde la halo atendimentu, MS halo inspesaun ba sentru saúde Maucatar

Pesoál saúde la halo atendimentu, MS halo inspesaun ba sentru saúde Maucatar

Ministériu Saúde liuhosi Inspetór hamutuk diretór halo inspesaun iha sentru Saùde Maucatar, hafoin rona informasaun pesoál saúde sira lahalo atendimentu ba pasiente sira iha oras servisu nian. Imajen Tatoli/Celestina Teles.

COVALIMA, 20 jullu 2022 (TATOLI)–Ministériu Saúde (MS) liuhosi  Inspetór Jerál, Duarte Ximenes, hamutuk ho  Diretór Jerál halo ona inspesaun iha sentru saúde Maucatar, munisípiu Covalima, relasiona ho informasaun ne’ebé haktuir pesoál saúde sira la halo atendimentu ba pasiente sira.

“Ami-nia  servisu halo  inspesaun kuandu rona iha problema iha fatin ruma ami halo verfikasaun. Ami simu informasaun iha nasionál, sentru saúde Maucatar iha problema, ami tun foti faktu hodi analiza, nune’e ami fó informasaun ho loloos no ami bele halo klarifikasaun ba informasaun ne’ebe ami simu,” Inspetór Jerál, Duarte Ximenes, ba Agencia Tatoli iha sentru saúde Maucatar, kuarta ne’e.

Atu klarifika loloos, agora ekipa téknika sei halo verifikasaun dokumentu, foti evidénsia hodi haree oráriu no husu informasaun hosi komunidade ne’ebé hela besik atu identifika loloos, ekipa sira sei haree oráriu servisu, rejista pasiente, distribui ai-moruk loron ida sai hira tanba ida-idak hala’o nia profisaun.

“Médiku laboratóriu halo analiza ba pasiente, ita sei rekolla ida ne’e. Ita labele fó sai opiniaun maibé tenke haree rezultadu servisu,” nia dehan.

Diretora Servisu Saúde Covalima, Maria de Fátima Moniz, reforsa hafoin mídia balun públika notísia doutór sira lahalo atendimentu maibé iha livru rejistu naran nian ne’e rejista hela pasiente na’in-25.

“Ami sa’e mai hodi haree konfirmasaun, ami haree livru rejistu jerál ba pasiente sira, pasiente na’in-25 no hosi númeru pasiente moras na’in-sia (9), klinte mai halo planeamentu família na’in-11, bebé sira hetan imunizasaun na’in-tolu (3) no konsellu ba inan ne’ebé foin atu partu ne’e iha pasiente na’in-rua (2),” nia informa.

Xefe Sentru Saúde Maucatar, Moises Gusmão, klarifika informaaun ne’e la loos tanba iha segunda (18/07) ne’e nia rasik halo atendementu ba pasiente sira-ne’ebé mai konsulta

“Iha loron ne’e ha’u rasik mak halo atendimentu pasiente iha sentru saúde maske ami iha doutór na’in ida de’it, tanba doutór halo oráriu hodi halo atendimntu iha postu saúde hahú segunda-tersa loron kuarta to’o sesta halo atendimentu iha sentru saúide Ogues,” nia klarifika.

Enfermeiru iha sentru saúde Maucatar hamutuk na’in-tolu (3) inklui xefe, parteira na’in-ida (1), médiku na’in-ida 91), laboratóriu na’in-ida (1), kontratadu saúde públiku na’in-tolu (3).

Jornalista : Celestina Teles

Editór      : Cancio Ximenes

iklan
iklan

Leave a Reply

iklan
error: Content is protected !!