iklan

EDUKASAUN, HEADLINE

UNTL peskiza duut fó nutrisaun ba karau

UNTL peskiza duut fó nutrisaun ba karau

Edifísiu sentrál Univesidade Nasionál Timor-Lorosa'e. Imajen Tatoli/Francisco Sony

DILI, 20 jullu 2022 (TATOLI)–Universidade Nasionál Timor-Lorosa’e (UNTL) ne’ebé tama iha grupu peskizadór 12 hosi programa peskiza Institutu Nasionál Siénsia Teknolojia (INCT, sigla portugés), daudaun ne’e rekolla amostra duut ne’ebé fó nutrisaun no hasa’e kresimentu karau.

Xefe Departamentu Siénsia Ezata no Siénsia Naturál hosi INCT, Gregório Rangel, relata katak peskizadór 12 hala’o hela atividade iha munisípiu lima.

“Peskizadór sira halo peskiza ba duut ne’e tanba hakarak hetan duut ne’ebé iha duni nutrisaun, nune’e kontribui ba projetu Kosta Súl iha futuru no aban bairua agrikultór bele utiliza hodi fó han karau sira. Peskizadór sira sei habai hela amostra duut no bainhira duut sira maran ona maka sei lori esperimentu ba halo teste iha laboratóriu,” Xefe Departamentu informa ba Agência Tatoli, iha edifísiu INCT, Balide, kuarta ne’e.

Notísia relevante: INCT prepara instala software atu fasilita matéria sientífika ba peskizadór sira

Grupu peskizadór 12 mai hosi área siénsia sosiál, siénsia naturál no ezata, enkuantu hosi área siénsia sosiál nia peskizadór sira hahú ona rekolla dadus no área siénsia naturál no ezata hahú halo ona prosesu rekolla amostra, atu nune’e bele kontinua halo esperimentu iha laboratóriu.

“Hosi dadus ne’ebé grupu peskizadór sira foti presiza halo duni esperimentu iha laboratóriu, atu nune’e bele identifika loloos amostra ne’ebé sira rekolla iha baze ne’e tuir duni objetivu peskiza ne’e ka lae. Tanba ne’e, ekipa monotorizasaun INCT presiza halo observasaun direita ba atividade sira iha terrenu,” nia akresenta.

Aleinde ne’e, bainhira ekipa halo monotorizasaun bele hatene esforsu peskizadór sira iha terrenu, oinsá sira bele lori instrumentu sira hodi rekolla amostra iha baze, hafoin lori mai halo diagnóstiku iha laboratóriu inklui halo identifikasaun no konkluzaun ba amostra sira.

Peskizadór hosi grupu 12 ne’ebé sai manán-na’in, hafoin hetan asinatura ho INCT, daudaun tama ona ba faze implementasaun peskiza, ne’ebé la’o hela iha terrenu. Prosesu peskiza ne’e hala’o iha area siénsia naturál, Siénsia Sosiál, ezata, no enjeñaria.

Atividade peskiza agora hala’o hela iha munisípiu Lautém, Manufahi, Bobonaro, Oé-cusse, Covalima, inklui Dili no Ataúru liu-liu iha área besik fronteira.

Jornalista   : Tomé Amado

Editora         : Julia Chatarina

iklan
iklan

Leave a Reply

iklan
error: Content is protected !!