COVALIMA, 20 jullu 2022 (TATOLI)–Polísia Unidade Patrollamentu Fronteira (UPF), Compañia Bravo entregra Uniforme Grupu Arte Marsiál (GAM) ne’ebé hatama liuhosi dalan ilegal ba Polísia investigasaun Kriminál Covalima iha Komandu PNTL Covalima.
“Ami simu sasán ilegál hosi UFP, uniforme hosi grupu arte marsiál balun hamutuk 19 no kopu 360, pasta kiik 100. Sasán hirak ne’ebé prende ne’e, ita-nia polisia UPF halo patrollamentu iha liña Fronteira Mota Masin konsege hetan sidadaun sira hodi hatama sasán,” Komandante PCIC Covalima, Sarjento Xefe Lourenco Gusmão, hateten ba jornalista sira iha Komandu PNTL Covalima.
Sarjentu Xefe Lourenco konsidera, sidadaun sira hatama sasán ho ilegál ne’e, hafoin hetan UPF halo pratrullamentu iha Fronteira sidadaun sira-ne’e halai husik hela uniforme entaun konsidera ema deskuñesidu hatama uniforme liuhosi fronteira Mota-Masin ho ilegál.
Sasán ilegál ne’ebé UFP halo apreensaun iha fronteira no entrega ba Komandu PNTL Covalima ne’e mak hanesan Uniforme GAM no tabako.
Sasán sira-ne’e UPF Kompañia Bravo Covalima halo apreensaun iha área fronteira bainhira sidadaun balun tenta atu lori tama no sidadaun hirak ne’e la konsege kaptura tanba halai lakon.
Hafoin UFP entrega sasán ba Komandu PNTL hodi halo identifikasaun no sei entrega ba Ministériu Públiku.
Jornalista : Celestina Teles
Editór : Cancio Ximenes
