iklan

HEADLINE, MUNISÍPIU, VIQUEQUE

Viqueque seidauk hatama taxa lisensa mensajen públisitáriu ba kofre Estadu

Viqueque seidauk hatama taxa lisensa mensajen públisitáriu ba kofre Estadu

Atividade treinamentu iha públisitariu no toponímia iha salaun administrasaun munisípiu Viqueque, kuarta (20/07). Imajen Tatoli/Vitorino Lopes da Costa

VIQUEQUE, 20 jullu 2022 (TATOLI)—Diretór Servisu Jestaun Merkadu  no Turizmu (DSJMT), Estevão de Carvalho, informa, durante ne’e munisípiu Viqueque seidauk rekolla taxa hosi mensajen publisitáriu ba kofre Estadu.

“Durante ne’e munisípiu Viqueque de’it maka seidauk hatama taxa ba kofre Estadu. Tanba ne’e, entidade relevante presiza serbisu maka’as hodi ita bele hatama taxa ba Estadu. Bainhira aprezentasaun iha nível nasionál munisípiu Viqueque seidauk iha servisu públisitáriu,” Diretór informa ba Agência Tatoli, iha abertura treinamentu públisitariu no toponímia, hosi Diresaun Nasionál  Organizasaun Urbana (DNOU),  iha salaun administrasaun munisipál, kuarta ne’e.

Nune’e, DNOU haruka  ona karta   direje ba Administradór munisípiu, ba diresaun DSJMT munisípiu Viqueque hodi realiza treinamentu kona-ba lisensa públisitáriu no toponímia.

“Estrutura munisipál indika partisipante ba treinamentu tanba atividade ne’e halai liu ba tékniku, oinsá  maka serbisu relasiona ho públisidade no toponímia. Bainhira ita mai partisipa de’it depois ita la implementa iha maka nafatin iha kotuk. Hahú treinamentu ne’e hotu, espera katak Diresaun Jestaun Merkadu no Turizmu ne’ebé toma-konta ba públisidade nian bele haree,” nia akresenta.

Notísia relevante: Abríl-maiu 2022: AMD rekolla taxa publisidade $11,209.04

Diresaun Jestaun Merkadu no Turizmu foin estabelese iha tinan 2022 maibé to’o agora seidauk iha xefe departamentu, funsionáriu no ekipamentu hodi  uza ba serbisu.

“Tanba ne’e, presiza ita-nia esforsu-an hodi lori serbisu la’o ba oin. Ha’u fiar katak liuhosi treinamentu ita sei hatama taxa ba Estadu,” Diretór ne’e tenik.

Iha fatin hanesan, Reprezentante Diresaun Nasionál Organizasaun Urbana, Aurélio Afonso, hateten, objetivu atividade treinamentu ne’ebé realiza durante loron-rua (hahú ohin no aban) ne’e hodi halo revizaun, bazeia ba dekretu-lei númeru 51/2016 kona-ba prosesu lisensiamentu ba mensajen públisitariu, primeira alterasaun ba dekretu-lei númeru 31/2017, ne’ebé   implementa ona iha PAM no AM sira hahú tinan 2017. Alende ne’e ho dekretu-lei númeru 29/2016 13 jullu kona-ba rejime jurídiku toponímia, oinsá halo atribuisaun no pilotu numerasaun polísia ba sidade urbana sira.

“Ami mai fó asisténsia, nune’e munisípiu bele halo planu hodi avansa ba postu administrativu sira no ita iha dekretu-lei ona. Atividade ne’e hodi garante implemensaun serbisu, organiza sidade urbana nomós loke dalan atu rekolla taxa atividade publisitária no toponímia bazeia ba kada forma publisidade, liu-liu fó kompeténsia ba Diresaun Jestaun Merkadu no Turizmu hodi hala’o knaar,” nia realsa.

Daudaun munisípiu seluk kuaze implementa hotu ona publisitária, tanba ne’e presenza DNOU halo treinamenetu hodi motiva Viqueque bele implementa atu labele lakon ho munisípiu sira seluk.

Atividade treinamentu ne’e partisipa hosi partisipante hamutuk 38 hosi instituisaun hanesan Diresaun Jestaun Merkadu no Turizmu, Servisu Obra Públika munisipál, Serbisu Água, Saneamentu no Ambiente, Rejistu Notariadu no Kadastru Planeamentu Integradu Dezenvolvimentu, Agência munisípiu Fiskalizasaun, Agência munisípiu Planeamentu, Serbisu Apoiu Sosidade Sivil, Servisu Rejistu no Verifikasaun Emprezariál, Instituto Públiku (SERVE, I.P) no Institutu Apoiu Dezenvolvimentu Emprezariál (IADE). 

Jornalista   : Vitorino Lopes da Costa

Editora         : Julia Chatarina

iklan
iklan

Leave a Reply

iklan
error: Content is protected !!