OÉ-CUSSE, 21 jullu 2022 (TATOLI) — Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, apoia Governu Sentrál hamutuk rihun $435-resin ($435,506.73) hosi Orsamentu Jerál Estadu (OJE) 2021 hodi harii postu Polísia Unidade Fronteira (UPF) Fatubasin no reabilita estrada ne’ebé lokaliza iha aldeia Quibiselu, suku Bobometo, sub-rejiaun Oésilo.
Montante ne’e komposta hosi $144,497.55 harii postu UPF ne’ebé ezekuta hosi empreza lokál Neno Unipesoál Lda, ho númeru kontratu, RAEOA-ZEESM TL SRF/UAL/2021-040, no projetu ne’e hahú iha 19 novembru 2021, daudaun ne’e progresu fíziku atinje ona 87%.
Nune’e mós ba projetu reabilitasaun estrada ezekuta hosi empreza lokál Bannila Unipesoál Lda, ho valór kontratu $291,009.18, ho númeru kontratu, 209/2021/PA/RAEOA-ZEESM TL, daudaun ne’e atinje ona 80%.
Prezidente Autoridade RAEOA, Arsénio Paixão Bano, esplika, tuir loloos konstrusaun ne’e responsável hosi Governu Sentrál liuhosi Ministériu Interiór maibé tanba prosesu sei kleur, nune’e autoridade apoia aloka osan hosi OJE RAEOA nian hodi konstrui, atu evita movimentu ilegál iha liña fronteira.
“Tinan barak ami haree postu ne’e kondisaun ladi’ak, ami husu membru sira hato’o preokupasaun barak tantu hela fatin no kondisaun uma, entaun ami koordena ho Governu Sentrál atu halo fatin ne’e, tanba ne’e mós postu ida iha Oésilo, depois ilegál tama sai barak liuhosi zona ida-ne’e, entaun sira husu beibeik mai autoridade, ha’u ko’alia ho vise-ministru interiór, dehan husik ami apoiu halo de’it ona,” Arsénio Bano relata relatóriu ne’e ba Ministru Asuntu Parlamentár no Komunikasaun sosiál (MAPKomS) bainhira hala’o vizita ofisiál iha postu UPF Fatubasin, kuarta ne’e.
Nia informa, postu UPF Fatubasin hetan vizita ona hosi xefe Estadu no xefe Governu anteriór sira, maibé seidauk iha mekanizmu atu hadi’a fatin ne’e, nune’e autoridade ho inisíativa harii hodi prevene tranzaksaun ilegál iha sub-rejiaun ne’e.
Molok konstrusaun ne’e hahú kondisaun estrada hosi estrada boot asesu ba postu ne’e situasaun aat, tanba rai-tahu entaun autoridade mós prevee tán Orsamentu Jerál Estadu (OJE) 2021 nian hosi RAEOA hamutuk hodi halo manutensaun.
“Ita aloka ba projetu rua, postu foun ne’e no reabilita estrada atu asesu mai, tanba ita haree Indonésia sira iha sorin kontinua la’o, entaun como ne’e iha RAEOA ita tenke halo hanesan sira iha sorin,” nia afirma.
Ministru ba Asuntu Parlamentár no Komunikasaun sosiál (MAPKomS), Fransisco Martins Jerónimo, orgullu tanba uluk 2001konsulta konstituisaun la’o iha fatin hotu-hotu, to’o sub-rejiauan haat Nítibe Pássabe no Oésilo tun to’o Pante Makasar seidauk hanesan ne’e.
“Maibé agora ha’u mai fali iha suku Malelat, iha estrada foun liga Pássabe to’o Nítibe iha liña fronteira, klínika foun no bee-moos ahi lakan oras 24 nia laran, ida-ne’e pasu boot tanba dezenvolvimentu la’o iha-ne’e, halo estrada ne’e ba komunidade atu sai hosi izolamentu liga ba sidade, atu nune’e bele sai dalan alternativu ba komunidade nia nesesidade,” Governante ne’e orgullu.
Nune’e hanesan reprezentante Governu Sentrál fó parabéns ba Prezidente Autoridade RAEOA ho membru tomak, Oé-Cusse oan ne’ebé maka iha fuan iha hanoin hakarak dezenvolve nia rai rasik, hodi lori dezenvolvimentu besik ba povu atu sai moris di’ak, tanba tau klínika, eskola, perfurasaun bee-moos, estrada nasionál atu hahú dadaun liga ba sub-rejiaun sira.
Jornalista : Abílio Elo Nini
Editór : Evaristo Soares Martins
