Janeiru-jullu: PNTL-VPU Covalima rejista kazu 23

COVALIMA, 21 jullu 2022 (TATOLI)–Xefe Investigasaun PNTL-VPU Covalima, Primeiru Sarjentu Amelia de Jesus Amarál, hateten Komandu Polísia Munisípiu Covalima liuhosi Unidade Ema Vulneravél (VPU-PNTL), hahú janeiru to’o jullu 2022 ne’e, rejista kazu hamutuk 23.

Xefe Investigasaun PNTL-VPU Covalima ne’e informa, PNTL-VPU Covalima rejista kazu 23 mak hanesan kazu violénsia doméstika, abuzu seksuál ba menoridade, violasaun seksuál, aktu seksuál ba adolesente, kazu ezevonismu, mostratu ba menór no mós kazu mostratu konjuji.

“Hahú fulan janeiru to’o loron ohin ami rejistu kazu hamutuk-23 ho tipu kazu ne’ebé mak la hanesan. Hosi kazu hirak ne’e, kazu violénsia doméstika kontinua aas nafatin,” Primeiru Sarjentu Amelia de Jesus Amarál hateten ba jornalista sira, iha resintu AMC, kinta ne’e.

Hosi numeru kazu hamutuk 23 ne’e, kazu 21 mak nia prosesu haruka ba Ministériu Públiku (MP) no falta kazu ida mak seidauk haruka ba MP.

“Horisehik ha’u foin simu tipu kazu violasaun seksuál ida-ne’ebé seidauk rejista iha Ministériu Públiku (MP) tanba  sei halo prosesu investigasaun. Testamuña halo identifikasaun ba suspeitu vitima no hein relatóriu médiku atu enkamiña ba Ministériu Públiku (MP),” nia dehan.

Ho nune’e, kazu 21 iha MP halo notifikasaun oinsa mós sira bele marka prezensa atu kontinua prosesu faktu forte, nune’e prokuradór bele halo akuzasaun.

Iha munisípiu Covalima, kada tinan PNTL-VPU Covalima rejistu kazu violénsia doméstika kontinua aas no avuzu seksuál ba menóridade.

Jornalista : Celestina Teles

Editór      : Cancio Ximenes