OÉ-CUSSE, 21 jullu 2022 (TATOLI) – Komunidade sira iha suku Bobometo, sub-rejiaun Oésilo, Rejiaun Administrativa Espesiál Oé-Cusse Ambeno (RAEOA), husu Governu liuhosi Ministériu ba Asuntu Kombatente Libertasaun Nasionál (MAKLN), atu hadi’a mekanizmu ba verifikasaun no pagamentu ba veteranu iha rejiaun ne’e.
“Ha’u rekomenda sei iha programa atu verifika dadus veteranu sei bele konsentra iha fatin públiku, sede suku nian, labele verifika iha uma privadu, tanba saida mak ha’u ko’alia hanesan ne’e? Dalabarak sira halo verifikasaun iha uma privadu, tanba orsida iha influénsia oinoin,” Komunidade Bento Bobo, hosi aldeia Oénoah, suku Bobometo, ko’alia iha serimónia lansamementu programa naroman ba suku iha salaun igreja Oésilo, kuarta ne’e.
Nomós ba parte segundu, bainhira atu halo verifikasaun hodi rejista veteranu foun, sei bele konsidera estrutura iha suku to’o baze, hanesan selkom, labele para de’it iha nurep, tanba uluk ita partisipa servisu ba ukun-án, ita koordena hosi leten tún to’o baze la para iha suku.
Agustinho Neno hosi aldeia Usapikolen, suku Bobometo, hateten, veteranu, ema-ne’ebé kaer kilat hetan pensaun 8 a 14, sira-ne’ebé hetan pankada ba baku hanesan hetan 8 a 14 ne’e la justu, tanba hetan torturasaun iha tempu hanesan maibé nia pensaun ketak-ketak, balun 8 a 14 balu no balun hetan fali 4 a 7.
“Bainhira mai verifika husu lai, uluk ita serbisu ne’e oinsá, keta hili de’it partidu, mai tuur hamutuk sé mak serbisu konta istória hakerek naran, labele naran lista de’it maibé uluk nunka hetan ema ne’e nia oin, ikus ne’e ami haree barak mak tama tanba partidu, sé aman veteranu feen oan tama hotu, ida-ne’e ladi’ak,” nia dehan.
Nia hatutan, depois ema foinsa’e nia bele sai fali testamuña ba katuas sira, ne’e foinsa’e iha 1999 nia idade foin tinan 10, nune’e sujere estrutura presiza tur hamutuk atu haree labarik ne’e uluk serbisu ka lae.
Hatán ba preokupasaun ne’e, Sekretáriu Estadu ba Asuntu Veteranu Kombatente Lidertasaun Nasionál, Júlio da Conceição, ‘Loro Mesak’ hatete, iha uma ka públiku la’ós kestaun, tanba sede konsellu vetarnu iha postu seidauk iha, entaun di’akliu koopera hamutuk, importante serbisu ho responsabilidade, karik komisaun sira mai, komunidade haree buat ruma la’o lalos bele halo keixa ba Sekretáriadu Estadu ba Asuntu Veteranu.
“Verifikasaun dadus foin lalais ita la’o hanesan ne’e duni tenke envolve estrutura to’o baze, maibé kada komisaun iha suku ida presiza ema na’in-tolu de’it, entaun nurep ho nia vise na’in-rua, agora selkom no responsável juventude feto mane nian, no estrutura seluk koopera malu hodi sai sasin ba ita-boot sira-nia ema sira-ne’ebé uluk serbisu hamutuk ho ita-boot sira, sei komisaun halimar polítika bele halo keixa,” nia fó hanoin.
Jornalista : Abílio Elo Nini
Editór : Evaristo Soares Martins
