HEADLINE, MUNISÍPIU, VIQUEQUE

MAE entrega UKL ba benefisiáriu iha Uatucarbau

MAE entrega UKL ba benefisiáriu iha Uatucarbau

Ministru Administrasaun Estatál (MAE), Miguel Pereira de Carvalho, hamutuk ho benefisiáriu ko’a pita UKL, iha aldeia Uatuloli, suku Uani-uma, postu Uatucarbau, kinta (21/07). Imajen Tatoli/Vitorino Lopes da Costa

VIQUEQUE, 21 jullu 2022 (TATOLI)–Ministru Administrasaun Estatál (MAE), Miguel Pereira de Carvalho, kinta ne’e, ofisialmente entrega Uma Kbiit Laek (UKL) ba benefisiáriu sira iha aldeia Uatuloli, suku Uani-uma, postu administrativu Uatucarbau, munisípiu Viqueque.

“Uma Kbiit Laek ne’e povu nian, liuliu inan kbiit laek sira. Ha’u espera uma ne’ebé Governu entrega ba benefisiáriu sira ne’e bele uza ho di’ak,” Ministru informa ba Agência Tatoli, hafoin ramata serimónia inaugurasaun UKL, iha aldeia Uatuloli, kinta ne’e.

Notísia relevante: Progresu konstrusaun UKL Viqueque atinje 70%

Suku Uani-uma hetan UKL unidade tolu ba benefisiáriu tolu hanesan Viegina da Silva, Virginha da Silva no Armindo Soares, ho totál orsamentu ba konstrusaun uma hamutuk $51.000.

Iha fatin hanesan, Reprezenta benefisiáriu UKL, Bernardo Soares, agradese ba VIII Governu ne’ebé oferse ona uma ne’ebé sei uza ba tempu naruk.

“Ami agradese ba Governu ne’ebé oferese ona uma ba ami, tanba aban bain rua ami laiha mós ha’u-nia oan sira hela no sei uza nafatin uma ne’e ho di’ak,” nia akresenta.

Biban ne’e, nia husu ba Governu hodi nafatin kontinua programa, nune’e maluk sira ne’ebé seidauk hetan bele hetan fali.

Serimónia ne’e partisipa hosi Administradór munisípiu Viqueque, Januário Soares ‘Bolly’, Administradór postu Uatucarbau, Direjente Programa Nasionál Dezenvolvimentu Suku (PNDS), Xefe Suku no komunidade lokál.

Jornalista   : Vitorino Lopes da Costa

Editora       : Julia Chatarina

iklan
iklan

Leave a Reply

iklan
error: Content is protected !!