MAPKomS lansa programa ‘Naroman ba Suku’ iha Oésilo
OÉ-CUSSE, 21 jullu 2022 (TATOLI)–Ministru ba Asuntu Parlamentár no Komunikasaun Sosiál (MAPKomS), kuarta ne’e lansa programa Governu nian ‘Naroman ba Suku ho’ diálogu aberta komunitáriu iha suku Bobometo, sub-rejiaun Oésilo, Rejiaun Administrativa Espesiál Oé-Cusse Ambeno (RAEOA).
Nune’e mós iha segunda semana ne’e, MAPKomS lansa dahuluk programa Naroman ba Suku ne’e iha komunidade suku Malelat, sub-rejiaun Pássabe, iha tempu hanesan realiza diálogu nakloke ho komunidade lokál sira.
“Ami mai iha-ne’e, iha programa VIII Governu nian ne’ebé lidera hosi Primieru Ministru, Jenerál Taur Matan Ruak, iha-nia programa lubuk ida, ne’ebé iha MAPKomS nia programa importante tebes mak ne’e, Governu iha komunidade nia leet, ne’e mak ita halo atividade Naroman ba Suku,” Ministru ba Asuntu Parlamentár no Komunikasaun sosiál (MAPKomS), Fransisco Martins Jerónimu, ko’alia iha ámbitu lansa programa naroman ba suku, iha salaun igreja Oésilo.
Ministru esplika, Governu mai hamutuk ho komunidade, mai lori ministru sira, sekretáriu estadu sira atu ko’alia ho komunidade hodi hatene saida mak komunidade nia halerik, nia presiza, hakarak atu hamutuk dezenvolve rai ida-ne’e ba oin, tanba prioridade importante iha dezenvolvimentu nasionál ne’e ba ema.
“Tan-ne’e iha programa VIII Governu nian maka, sentru ba dezenvolvimentu rai ida-ne’e maka ema, ema iha ne’ebé ema Timor-oan, entaun ema mak tenki hatene hadi’a buat hotu, nune’e bele lori rai ne’e ba oin, entaun ami mai atu ko’alia ho ita-boot sira saida mak atu halo saida mak halo ona no saida mak atu halo fali iha tempu oin mai,” nia afirma.
Nia fó ezemplu, fundu mina-matan iha tasi-laran, nia turuk hosi leten tenke to’o ita-boot sira, bele uitoan mós tenke to’o ita boot-sira nia liman, labele para de’it iha klaran, lae iha kraik sai mamuk.
Iha biaban ne’e, Govenante ne’e relata sai kona-bá progresu no programa prioridade ba VIII mak hanesan, hasa’e pensaun ba autoridade komunitáriu, cesta bázika, subsidíu $200 kada tinan, UKL no UKL+, Bolsa da Mãe Jerasaun foun, bolsa estudu ba edukasaun no saúde no setór seluk tán.
“Ha’u-nia ekipa tékniku sei mai fali atu halo dokumentasaun halo filmajen intervista komunidade autoridade lokál atu identifika produtu potensialidade kada suku idak-idak, nune’e bele fó ba munisípiu hotu-hotu, no komunidade nia hakarak oinsá, presiza tán apoia saida hosi Governu nune’e nune’e ita bele hatene potensialidade suku Bobometo nian,” nia informa.
Xefe suku Bobomto, Yoseph Elo, agradese ba VIII tanba hili suku Bobometo hodi implementa programa Naroman ba Suku, iha aldeia sia ho totál populasaun 8.751 komposta hosi mane 4.448 no feto 4.303 ne’ebé maka ezizte iha suku refere.
“Ha’u agradese ba VIII Governu tanba hili ha’u-nia suku atu implementa programa ne’e, lansamentu ne’e bele sai ezemplu ba suku 17 iha Oé-Cusse atu hamutuk koopera ho Governu no Autoridade atu dudu prosesu dezenvolvimentu ba oin,” nia orgullu
Prezidente Autoridade RAEOA, Arsénio Paixão Bano, haksolok tanba Governu mai ko’alia direita ho komunidade Bobometo no Malelat.
“Bainhira Parlamentu sira husu, nia mak responde direita reprezenta membru Governu sira, entaun mai Oé-Cusse atu rona direita ba komunidade, tanba realiza ona iha suku Malelat, vizita ona konstrusaun sira iha Oé-Cusse, ohin iha Bobometo, atu hatene populasaun sira iha-ne’e hakarak saida tán bele hato’o ba ministru, lori preokupasaun sujestaun bai ha Governu Sentrál atu hamutuk fó solusaun ba prosesu dezenvolvimentu,” nia katak.
Nia informa, iha sub-rejiaun iha suku tolu, Usitasa’e, Usitaqueno no Bobometu projetu ne’ebé autoridade halo ona mak, perfurasaun bee-moos, loke estrada foun liga ba suku, harii eskola no postu saúde, harii gabiaun no planu reabilitasaun Estrada rurál.
“Maibé ha’u fiar katak Bobometo ne’e hakarak buat barak, hato’o ba ministru, liuliu veteranu sira, feto potensiál, juventude, profesór no estudante sira,” nia informa.
Entretantu, partisipa iha lansamentu programa Naroman ba Suku ne’e, mai hosi Sekretáriu Estadu ba Asuntu Veteranu Kombatente Lidertasaun Nasionál, Júlio daConceição, ‘Loro Mesak’, xefe Gabinete Ministériu Agrikultura no Peska (MAP), Prezidente INFORDEPE, Manuel Gomes de Araújo, autoridade komunitária mai hosi suku Usitasa’e Usitaqueno no Bobometo, veteranu, grupu feto potensiál juventude, inklui estudante profesór no komunidade.
Jornalista : Abílio Elo Nini
Editór : Evaristo Soares Martins
