PCIC halo apreensaun ba mákina slot unidade 20 iha covalima
COVALIMA, 21 jullu 2022 (TATOLI)–Polisia Siéntifiku Investigasaun Kriminál (PCIC, Sigla Portugés) hamutuk ho Komandu PNTL Covalima ezekuta mandadu buska hodi halo apreensaun slot mákina unidade 20, tuir mandadu Tribunal Distrital Suai (TDS), iha suku Debos, postu Suai, munisípiu Covalima.
“Ohin-loron ami hosi PCIC koopera hamutuk ho komandu PNTL Covalima ezekuta mandadu buska no apreensaun domisilária ba fatin jogu. Ami ezekuta buska, nune’e atividade jogu ilisitu la kontinua la’o hafoin ami ezekuta buska objetu ilisitu, ami halo kedas apreensaun no transporta kedas ba iha edifidiu MP,” Xefe Seksaun Investigadór Prevensaun Konflitu PCIC, Florencio Guterres, hateten ba jornalista sira, iha Tabakolot, kinta ne’e
Iha Buska no apreensaun ne’e, PCIC ezekuta mandadu buska no apreensaun ne’e konsege prende sasán sira hanesan Mákina Slot unidade 20, rolet kabuar-ida (1) rolet naruk ida (1) meja jogu ho tipu kuru-kuru ida no mós kadeira-meja no kamera vijilánsia.
Hafoin halo apreensaun sasán sira-ne’e, ekipa Polisia Nasionál Siéntifika Investigasaun Kriminál (PCIC) lori kedas ba Ministériu Públiku (MP).
Uma-na’in, António Alves Fahik, konsidera jogu ne’e la’o legál tanba reprezentante hosi Ministériu Públiku (MP) mak mai halo abertura, nune’e fó fatin ba aluga hodi loke jogu refere. Maibé, problema selu fatin aluga ladi’ak, nia parte mak prende sasán sira-ne’e hodi na’in bele selu molok foti sasán hirak ne’e.
Antes ne’e iha loron 15 fulan-juñu tinan ne’e, PCIC halo apreensaun mákina jogu unidade 17 iha suku Debos, postu administrative Suai, munisípiu Covalima.
Jornalista : Celestina Teles
Editór : Cancio Ximenes
