DILI, 21 jullu 2022 (TATOLI)—Ministériu Saúde liuhusi Diresaun Nasionál Apoiu Servisu Hospitalar (DNASH), realiza konsulta espesializada hodi komemora loron nasionál saúde ba dala-VIII iha munisípiu Ainaro.
Objetivu husi atividade ne’ebé hala’o iha Munisípiu Ainaro hodi komemora loron nasionál saúde ba dala-8 ho Tema mak Haforsa Pakote Servisu Esensiál ba Inan no Oan “SAÚDE INAN NO OAN SAUDE BA NASAUN”, ne’ebé realiza iha loron 22 jullu 2022.
“Populasaun hamutuk 1.333 husi postu administrativu haat mak hanesan Nunumoge, Aituto, Foho-Ailiku, no Suro kraik mak benefisia huoi konsulta espesilaizada ida ne’e,”Xefe Departamentu Apoia Koordenasaun Servisu Espesializadu iha Ministériu Saúde , Nilton da Costa Cruz, hateten ba Agência TATOLI via WhatsApp, kinta ne’e.
Iha konsulta espesializada ida ne’e ba populasaun maioria ho tinan 40 ba leten, ne’ebé deteta moras dominante mak tensaun aas, infesaun respiratóriu aguda, tuberkoluze, diareia aguda, Gastritis aguda (moras estómogu), moras matan (dook ka besik la moos) no katarak.
“Iha konsluta ne’e mós deteta moras ruin nian hanesan osteoarthritis no mialgia inklui mós moras kulit sira hanesan eskabiosis no tinea korporis,” nia afirma.
Nilton da Costa dehan, bainhira deteta moras ne’ebé grave sei haruka ba halo tratamentu intesivu iha Sentru Saúde Ainaro no bele transfere mai iha HNGV atu kontinua tratamentu.
“Ita deteta moras ladun grave ita fó kedan reseita ka ai-moruk atu sira konsumu,”nia esplika.
Médiku espesalista ne’ebé hala’o atividade konsulta ne’e mak medisina interna, kardiolojista, dermatolojia, pediatria, ortopedia, enfermeiru, radiographer laboratoriu,no farmasia.
Alende konsulta espesializada, Ministériu Saúde, USAID, UNICEF hala’o mós lansamentu Melloramentu Bee, Saneamentu no Ijíene (BESI) ba Fasilidade Saúde.
biban ne’e, Ministru Saúde, Bonifacio Maucoli Dos Reis, agradese USAID no Unicef ne’ebé sai hanesan paraseiru ne’ebé kleur tebes hamutuk ho Ministériu Saúde hodi hametin di’ak liutan Sistema Nasionál Saúde, iha momentu ida difisil tebes sira mak sai parseiru inportante hodi instala bee iha fatin hotu-hotu.
“Ha’u hanoin lansamentu ida-ne’e, iha territóriu tomak ita iha Sentru Saúde hamutuk 69, iha Sentru Saúde 41 mak iha ona bee no saneamentu 56% sentru saúde sira ne’e mak iha ona bee no saneamentu. Restante sei iha 40% ba leten ne’ebé presiza responsabilidade husi governu sentrál to’o lokál atu identifika, nune’e ita bele instala bee no saneamentu. Ministeriu Saúde kontinua hametin di’ak liutan relasaun ho parseiru sira, nune’e bele fó resposta liuliu ba iha saúde ambientál,” refere nota ne’ebe TATOLI Aasesu.
Entretantu, iha komemorasaun ne’e MS hamutuk Funsionáriu Ministériu Saúde munisipál ho parseiru sira hala’o ezersísu marsa saudável, ne’ebé partisípa másimu husi estudante Ainaro-oan. Hafoin atividade la’o kontinua kedas ho atividade desportu hanesan dada tali, kuiz, sa’e bua, poco-poco, halai karon, joga bola feto no mane.
Jornalista : Felicidade Ximenes
Editór : Florencio Miranda Ximenes
