BOBONARO, HEADLINE, MUNISÍPIU, POLÍTIKA

Vise MAE halo reflesaun serbisu Governu ho autoridade lokál Maliana

Vise MAE halo reflesaun serbisu Governu ho autoridade lokál Maliana

Autoridade lokál iha postu administrativu Maliana, munisípiu Bobonaro partispa enkontru ho Vise-Ministru Administrasaun Estatal, Lino de Jesus Torrezão. Imajen Tatoli/Sergio da Cruz.

BOBONARO, 21 jullu 2022 (TATOLI) – Vise-Ministru Administrasaun Estatál (MAE), Lino de Jesus Torrezão, kinta ne’e realiza enkontru ho lideransa komuntária sira iha postu administrativu Maliana hodi halo reflesaun ba serbisu Governu Sentrál nian.

‘Ha’u mai halo reflesaun kona-bá serbisu sira ne’ebé mak liu tiha ona, luliu kona-bá eleisaun prezidenesiál, ha’u foti medida balu ba xefe suku katak lideransa komunitáriu hanesan governu sentrál nia ain-liman,ne’ebé hela hamutuk ho komunidade atu habelar no hatutan programa governu nian,” nia imforma ba Jornalista sira, iha salaun administrasaun Bobonaro, kinta ne’e.

Objetivu hosi enkontru ne’e atu fó koñesimentu kle’an ba lideransa komunitária sira, hanesan xefe suku, xefe aldeia, delegadu no pesoál apoia administrasaun suku (PAAS) sira kona-bá planu no programa ne’ebé governu implementa, liuliu programa Uma Kbi’it Laek (UKl) regulár no (UKL+).

Ezekutivu ne’e salienta, programa sira-ne’e tenke hatún mai kraik atu benefísia komunidade sira no komunidade sira mós bele iha koñesimentu kle’an ba programa VIII Governu Konstituisionál trasa ona.

“Program programa UKL+ ne’e programa foun, ne’e mak ita atu fó koñesimentu ba sira, maizumenus ninia objetivu hosi programa ne’e mak saida, UKL+ ne’e iha tipu (A) uma ne’ebé mak leten tali-tahan ka  kalen ferujen sira depois meia parede ho simente rai laiha, ita baku rahun ita halo foun fali,” nia akresenta.

Iha tinan ne’e, Ministériu Administrasaun Estatál (MAE) liuhosi Programa Nasionál Dezenvolvimentu Suku (PND) sei konstrui UKL+ uma unidade 6000 iha territóriu nasionál ho kategoria rua mak hanesan kategoria (A) totál uma  1000  ho nia kustu másimu $13,000 inklui mão de obra, médiu distribuisaun uma 71/PA/M kada suku sei hetan uma lima ka neen.

Enkuantu kategoria (B) sei konstrui uma hamutuk unidade 5000 ho kustu $2,400 inklui mão de obra $100 ho médiu distribuisaun 357 uma/PA/M no kada suku hetan uma 27 ba to’o 28.

Prezidente Aautoridade Munisípiu Bobonaro, Ernesto de Oliveira Barreto, husu ba lideransa komunitaria sira iha postu administrativu Maliana, atu kopera ekipa verifikadór hodi identifika benefisiáriu UKL+ ho transparante tuir matadalan ne’ebé estabelese ona.

“Ita tenke serbisu ho didi’ak atu komunidade sira bele satisfaz, atu nune’e ikus mai labele mosu reklamasaun oinoin,” nia apela.

Xefe suku Ritabou, postu administrativu Maliana, munisípiu Bobonaro, Maximiano dos Santos Araújo, sente kontente no apresia ho inisiativa Vise Ministru Lino de Jesus Torrezão, tanba liuhosi enkontru ne’e bele hakbiit sira-nia koñesimentu.

“Ha’u hanesan xefe suku prontu koopera ho polítika governu nian, tanba ami haree katak programa ne’e benefísia tebes ba komunidade sira, liuliu sira-ne’ebé kbiit laek, ha’u sente programa UKL ne’e bele responde ona komunidade sira-nia preokupasaun durante ne’e,” nia apresia.

Totál benefisiáriu UKL+ iha munisípiu Bobonaro kategoria (A) monu iha postu administrativu Balibo ho totál 75 no kategoria (B) monu iha postu administrativu Maliana ho totál 259.

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!