iklan

NASIONÁL, HEADLINE, INKLUZAUN SOSIÁL

ANC ho SEII realiza semináriu abordajen jéneru

ANC ho SEII realiza semináriu abordajen jéneru

ANC no SEII hala'o semináriu abordajén jéneru ba funsionáriu iha salaun City 8, Manleuana, sesta (22/07). Imajen Tatoli/Francisco Sony

DILI, 22 jullu 2022 (TATOLI)—Autoridade Nasionál Komunikasaun Timor-Leste (ANC, sigla portugés) hamutuk ho Sekretaria Estadu ba Igualdade no inkluzaun (SEII), sesta ne’e, realiza semináriu abordajen jéneru.

Prezidente ANC, João Olívio Freitas, hateten, objetivu realiza semináriu ne’e atu ezekuta programa VIII Governu, ne’ebé espesifikamente kona-ba programa jéneru.

“Ita atu hakle’an liután koñesimentu funsionáriu ANC inklui partisipante sira hodi intende didi’ak iguldade jéneru no inkluzaun,” Prezidente ANC, hateten, iha City 8 Manleuana.

Nune’e, iha pontu haat importante mak ko’alia iha semináriu hanesan kualidade inkluzaun kona-ba asesu, kotrolu, partisipasaun no atendimentu servisu.

“Liuhosi semináriu ne’e bele tulun ANC iha servisu loron-loron, atu hadi’a liután atendimentu, tanba ita sei atende ema mai ho nia karakter la hanesan ho kondisaun fíziku, mentál no rasa. Ita espera SEII nia apoiu ne’e ajuda ita, liuliu servisu ba públiku,” akresenta.

Notísia relevante: ANC no TANE Konsumidór asina akordu kooperasaun proteje direitu konsumidór

Ko’alia kona-ba dezenvolvimentu ne’e la’ós ema ida nian de’it ka área balun de’it, maibé inklui ema hotu, ne’ebé la husik ema ida iha kotuk maski ema ida bele mai ho kondisaun saida de’it tenke atende ho di’ak.

“Ho informasaun sira bele loke liután hanoin atu iha servisu atendimentu ba públiku ne’e iha hanoin hanesan atu trata ema ne’ebé mai ho kondisaun la hanesan maibé ho modelu hanesan,” nia dehan.

Iha fatin hanesan, Diretór Jerál SEII, Armando da Costa, konsidera atividade ne’e importante tebes nune’e kada funsionáriu iha instituisaun idaidak bele implementa igualdade jéneru.

“Ita ko’alia kona-ba iguandade jéneru no inkluzaun, importante tebes tanba durante ne’e ita mós akompaña servisu ANC no instituisaun sira seluk hatudu vontande di’ak tebes, partisipa iha polítika Estadu no Governu ba iha integrasaun jéneru no inkluzaun iha orsamentu no programa sira hosi Governu,” nia tenik.

Durante ne’e SEII mós haree katak kada instituisaun iha sira-nia integrasaun prespetiva jéneru iha sira-nia programa no polítika.

Daudaun ne’e, SEII rasik kolabora ho ANC iha ona planu, atu ANC hanesan reguladora ba meiu internet, ne’ebé iha formasaun utilizasaun internet ba munisípiu sira bele kria plataforma iha mídia sosiál hodi fasilita inan-feto sira iha área rurál ba atividade negósiu

“Ita-nia inan-feto sira iha área rurál ne’e maioria halo negósiu, maibé atu uza meiu mídia sosiál promove sira-nia produtu sira ne’e seidauk hatene,” nia nota.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!