DILI, 22 jullu 2022 (TATOLI)—Empreza Visio DEI, kinta ne’e, entrega ona termu referénsia ba reabilitasaun halo moru, instalasaun eletrisidade no hadi’a odamatan iha merkadu Manleuana ba Autoridade Munisípiu Dili (AMD).
Adjuntu Prezidente Autoridade Munisípiu Dili, António Moniz Cláu, ne’ebé reprezenta Prezidente Autoridade Munisípiu Dili (PAM), Guilhermina Filomena Saldanha, hato’o agradese ba empreza Visio DEI ne’ebé finaliza reabilitasaun ba halo moru, instalasaun eletrisidade no hadi’a odamatan sira iha Merkadu Manleuana.
“Ohin, ita hotu hatene katak tuir notifikasaun inspesifikasaun tékniku ne’ebé iha hatudu ona katak projetu sira ne’e 100% no entrega ba projetu na’in munisípiu Dili,” Adjuntu Prezidente Autoridade Munisípiu Dili, António Moniz Cláu, hateten lia hirak ne’e, liuhosi nia diskursu iha serimónia entrega referénsia reabilitasaun ba Autoridade Munisípiu Dili, iha merkadu Manleuana, Dili, kinta ne’e.
Tuir kontratu ne’ebé empreza halo ho Autoridade Munisípiu Dili hahú hosi setembru to’o dezembru 2021 ho projetu 100%, maibé iha atrazu fulan hitu (7) nia laran tanba atrazu hosi Obras Públika liu-liu kona-ba teste materiál, kooperasaun ladun di’ak hosi vendedór sira ne’e mak impede kompañia nia servisu hodi to’o ohin loron foin entegra projetu ne’e.
Tuir lolos iha 31 dezembru 2021 ne’e, Autoridade Munisípiu Dili simu ona projetu ne’e maibé ho difikuldade ne’ebé empreza Savio DEI hasoru mak foin entrega ba AMD.
“Ho ida ne’e, hanesan Autoridade Munisípiu Dili fó hanoin ba inan aman sira hotu no mós ba ita-nia Jestór Merkadu iha ne’e atu tau atensaun ba aktu sira hanesan ne’e bainhira iha tan projetu ruma ne’ebé tuir mai, labele iha tan impedimentu ba implementa projetu sira-0ne’e,” nia dehan.
Ho reabilitasaun ne’e, Adjuntu Prezidente Autoridade Munisípiu Dili husu ba inan aman sira iha merkadu Manleuana atu kuida ba reabilitasaun projetu ne’ebé entrega ona hosi empreza Savio DEI.
Jerente Kompañia Visio DEI, Mariano Miguel, hateten Kompañia Visio DEI hahú reabilita merkadu manleuana iha setembru 2021, iha prosesu nia laran kompañia hetan difikuldade liu-liu iha atraza ba teste materiál, tanba iha Ministériu Obra Públika rekomenda katak kuandu halo obra ida tenke iha mós rekomendasaun teste tenke tuir estandar, ida ne’e mak durante kompañia halo ho nia prosesu han tempu uitoan.
Entretantu, ho kontratu reabilitasaun ba projetu ne’e ho totál orsamentu hamutuk millaun $86-resin.
Jornalista : Nelia Fernandes
Editór : Cancio Ximenes
