Estoke suplementu nutritivu hahú menus iha sentru saúde Vera-Cruz
DILI,22 jullu 2022 (TATOLI)—Koordendadór Programa Nutrisaun Sentru Internamentu Vera-Cruz, António da Cruz, informa daudaun ne’e estoke suplementu alimentar nutritivu ka susubeen ho tipu F-75 no F-100 hahú menus.
“Suplementu nutritivu F-75, F-100 no Ready to use therapeutic foods (RUTF), nia estoke iha sentru saúde Vera-Cruz daudaun ne’e laiha tanba iha marsu liuba expire ona entaun too agora estoke foun seidauk tama,” Koordendadór Programa Nutrisaun ne’e hateten ba jornalista sira iha nia knaar fatin-Caicoli, sesta ne’e.
Suplementu nutritivu ka susubeen ho tipu F-75 no F-100, ne’e ba labarik sira ne’ebé mak má nutrisaun grave no Ready to use therapeutic foods (RUTF) ba labarik sira ne’ebé mak má nutrisaun moderadu liuliu ba labarik idade tinan lima mai kraik.
Estoke laiha ne’e, nia dehan fó impkatu maka’as ba pasiente ka labarik sira ne’ebé sofre má nutrisaun. Tanba ne’e, médiku nutriosista sira lor-loron fó akonselamentu ba inan-aman sira atu prepara ai-han nutritivu ba labarik sira atu evita labele sofre má nutrisaun grave.
“Ami nia estoke laiha, nune’e ami esforsu nafatin halo promosaun ba ai-han lokal sira, liuliu bebé-sira sei hemu susubeen, inan sira han ai-han nutritivu atu nune’e fó nutrisaun di’ak ba labarik,” nia esplika.
Tanba tuir nia, atu hasa’e labarik sira nia todan presiza tempu naruk, nune’e tenke halo tratamentu rutina no hemu ai-moruk to’o hotu. Tanba ne’e mak inan-aman sira tenke prepara ai-han nutritivu atubele rekupera fali nia-saúde.
“Daudaun, ami uza suplementu minerál rahun ka micronutriente hodi tau ba sasoro atu fó ba bebé sira han. Kada fulan sentru saúde internamentu ne’e rejista má nutrisaun 20-resin,” nia afirma.
Nune’e, Sentru Saúde Vera-Cruz submete ona pedidu distribuisaun ba Servisu Saúde Munisípiu Dili, maibé resposta dehan suplementu nutritivu nia estoke mós hotu iha armazein Servisu Autónomu Médikamentu no Ekipamentu Saúde (SAMAS).
“Ami hato’o ona karta ba, maibé resposta mai dehan estoke iha SAMES mós laiha. No dehan daudaun iha ona dalan ne’ebé to’o mai Timor-Leste mak bele distribui ba fasilidade saúde iha territóriu nasionál,” nia afirma.
Jornalista : Felicidade Ximenes
Editór : Florencio Miranda Ximenes
