Top

Komisaun F sei hala’o estudu komparativu ba Malázia

Prezidente Komisaun F, Noe da Silva ‘Buka Tuir’. Imajen tatoli/Nelson de Sousa.

DILI, 22 jullu 2022 (TATOLI)—Deputadu na’in-sia (9) no tékniku na’in-haat (4) iha komisaun F trata asuntu Saúde, Seguransa Sosiál no Igualidade Jéneru iha Parlamentu Nasionál (PN) sei hala’o estudu komparativu ba Malázia iha 25 jullu no sei fila-fali mai iha 02 agostu 2022.

Notísia Relevante: Janeiru-marsu, MS transfere ona pasiente 103 ba rai-liur

“Estudu komparativu ne’e ami sei haree espesífiku ba ita-nia sidadaun sira agora halo tratamentu saúde iha Jakarta-Indonézia no Malázia hod haree problema saida mak presiza resolve no hafoin hetan dadus hodi aprezenta ba Governu,” Prezidente Komisaun F, Nóe da Silva ‘Buka Tuir’, informa ba Agéncia TATOLI iha Parlamentu Nasionál, sesta ne’e.

Tuir planu komisaun mós sei halo estudu komparativu kona-ba jardin erói haloot restu motál hodi bele hetan referénsia, nune’e bele prodús relatóriu hodi rekomenda ba parte ezekutivu hodi hadi’a liután.

“Haree mós jardin aguarda ita-nia erói sira restu mortáis aleinde haree prosesu atendimentu iha jardin ita hakarak haree ba ida-ne’e,” nia dehan.

Membru komisaun F, Deputada Maria Barreto, hateten vizita estudu komparativu nia objetivu loloos atu haree kona-ba situasaun kooperasaun bilaterál entre Governu Timor-Leste ho Malázia no mós Indonézia iha área saúde nian liu-liu kontratu ospitál ne’ebé mak akontese entre Timor-Leste ho Malasia no mós Indonézia.

“Tanba tuir informasaun no dadus ne’ebé ami simu katak iha kontratu ne’e iha ninia implementasaun la ajuda pasiente sira maibé fó mós afeta ba iha situasaun pasiente sira-ne’ebé mak Ministéiru Saúde transfere ba iha Malázias nomós iha Indonézia. No ita-nia ema sira-ne’ebé mak transporta ne’e kuaze maiória mós veteranu sira ho povu kbiit laek. Entaun ho situasaun ne’e ho vizita ne’ebé komisaun F ba atu haree no rona didi’ak atu nune’e aproveita ho tempu Orsamentu Jerál Estadu (OJE) 2023 hodi komisaun bele tau atensaun ba iha informasaun hirak ne’ebé iha. Depois informasaun ne’ebé ami hetan durante vizita ne’e hodi bele fó fila-fali sujestaun ba Governu atu bele haree situasaun sira-ne’e,” nia hateten.

Tuir Deputada hosi bankada CNRT ne’e katak, tuir informasuan ne’ebé durante ne’e hetan problema mak kona-ba apoiu orsamentu ba iha pasiente liu-liu ospitalária no situasaun nesesidade, ida ne’e mak fó impaktu makaas ba pasiente no tratamentu parseiru sira maibé liu hosi vizita ne’e mak sei rekolla liután dadus ak bele hatene loloos.

Jornalista : Nelson de Sousa

Editór        : Cancio Ximenes

Publisidade

Leave a Reply

Latest Post

error: Content is protected !!