VIQUEQUE, 22 jullu 2022 (TATOLI)–Ministru Administrasaun Estatál (MAE), Miguel Pereira de Carvalho, sesta ne’e, inaugura no entrega Uma Kbiit Laek (UKL) ba benefisiáriu iha aldeia Maukiak, suku Matahoi, postu administrativu Uatulari, munisípiu Viqueque.
“Ohin ha’u mai entrega UKL ba benifisiáriu tolu iha suku Matadohi. Uma ne’e diretu benefisiáriu nian,” Ministru hateten ba Agência Tatoli, iha suku Matahoi, hafoin ramata serimónia inaugurasaun UKL, aldeia Maukiak, suku Matahoi, sesta ne’e.
Governante ne’e dehan, uma ne’ebé Governu harii hanesan povu nian tanba osan ne’ebé Governu jere povu nian hodi halo uma.
“Ha’u lori Governu no Estadu nia naran, mai entrega uma ne’e ba benefisiáriu. Ha’u-nia espetativa benefisiáriu sira uza uma ne’e ho kontente, hela iha laran ba depois tau-matan ba uma no tau-matan ba imi-nia oan sira,” Ministru hameno.
Notísia relevante: MAE entrega UKL ba benefisiáriu iha Uatucarbau
Iha fatin hanesan, Reprezentante benefisiáriu UKL, Lucas Amaral, agradese ba governu ne’ebé oferese ona uma.
“Aban bain-rua Governu kria mós uma hanesan ne’e ba ami-nia maluk sira ne’ebé hanesan ami,” nia hato’o.
Benefisiáriu tolu ba UKL iha suku Matahoi mak hanesan Bebinda Amaral, Lucas Amaral no Maria Soares, ho totál kustu ba uma tolu hamutuk $51,000.
Postu Uatulari sei hetan UKL unidade 18, iha suku neen, ne’ebé uma-tolu entrega ona ba benefisiáriu sira.
Jornalista : Vitorino Lopes da Costa
Editora : Julia Chatarina
