iklan

HEADLINE, MUNISÍPIU, VIQUEQUE

MAE espera sede administrasaun Uatulari foun bele ajuda atende komunidade ho di’ak

MAE espera sede administrasaun Uatulari foun bele ajuda atende komunidade ho di’ak

Serimónia inaugurasaun edifísiu administrasaun Uatulari, sesta (22/07). Imajen Tatoli/Vitorino Lopes da Costa

VIQUEQUE, 22 jullu 2022 (TATOLI)–Ministru Administrasaun Estatál (MAE), Migul Pereira de Carvalho, inaugura edífisiu adminitrasaun Uatulari, ne’ebé konstrui iha tinan 2019 liuhosi programa Planeamentu Integradu Dezenvolvimentu Munisipál (PIDM).

“Estadu no Governu halo esforsu hodi kria fasilidade hodi fasilita, hanesan edifísiu administrasaun ne’ebé ohin ita inagura ona, espera bele ajuda Administradór atende ita-nia komunidade iha postu administrasaun Uatulari ho di’ak. Edifísiu ne’e ita tau administrasaun hodi funsionáriu bele tau-matan ba komunidade sira-nia moris,” Ministru hateten ba jornalista sira hafoin ramata serimónia inaugurasaun postu administrasaun Uatulari, sesta ne’e.

Notísia relevante: MAE inaugura edifísiu postu Uatucarbau

Iha fatin hanesan, Diretora empreza Lemadae Unip Lda, Zelia Pedro dos Santos, haktuir, prosesu konstrusaun edifísiu postu Uatulari, hahú loron 05 agostu 2019.

“Dezafiu ne’ebé ami hasoru durante konstrusaun mak ho situasaun COVID-19, entaun  ami halo serbisu sempre paradu. Iha tinan 2021 maka ami halo konstrusaun la’o no abril 2022 mak ramata,” nia akresenta.

Orsamentu ba konstrusaun edifísiu no morru haleu administrasaun hosi fundu PIDM ho montante $.158.411,93

Nune’e mós, Administradór postu Uatulari, Manuel do Rosário, hateten, postu ne’e iha suku hamutuk neen, ho totál populasaun 7.479 no funsionáriu ne’ebé serbisu iha administrasaun postu hamutuk ualu.

Jornalista   : Vitorino Lopes da Costa

Editora       : Julia Chatarina

iklan
iklan

Leave a Reply

iklan
error: Content is protected !!