DILI,22 jullu 2022 (TATOLI)- Komandu FALINTIL-Forsa Defeza Timor-Leste (F-FDTL), liuhosi Komandante Komponente Navál, Capitão da Mar e Guerra, Higíno das Neves, sesta ne’e, desmantela no abate ka destroi ró komponente navál NRTL Camanasa tanba kondisaun mákina avária totál no kle’ur la halo operasaun iha tasi laran.
Desizaun halo desmantalasaun ba ró navál ne’e ho baze ba iha despaisu hosi Ministru Defeza númeru 1.143, 11 jullu 2022, hodi autoriza Xefe Estadu Maiór Jenerál F-FDTL halo desmantellamentu ba ró NRDTL Camanasa.
“Ohin, ita halo abate ka desmantella ba ró komponente navál ida ho marka NRTL Camanasa. Desmantellamentu ne’e ho objetivu haree ba kondisaun ró labele ona halo operasaun iha tasi laran tanba ró ne’e tuan loos ona kuaze tinan 30 ona,” Komandante Komponente Navál ne’e hateten ba jornalista sira hafoin preside seremonia desmatellamentu ne’e iha portu Dili.
Iha loron 26 setembru 2011, Governu Korea Súl liuhoi hosi Reprezentante Ministru Defeza Repúblika Koreia, Majór Jenerál, Jeon Dong Wun no Embaixador Koreia iha Timor Leste Seo Kyoung-Suk, entrega ró tolu ba Timor-Leste liuliu ba F-FDTL atu aumenta kapasidade asegura riku-soin tasi.
Bainhira entrega ba F-FDTL liuhosi Komponente Navá entrega tan ró rua ba Polisia Nasionál Timor-Leste (PNTL), Unidade Polisia Marítima (UPM), maibé seidauk to’o semana ida, ró refere la konsege halo operasaun tanba ho kondisaun tuan ona.
“Liuhosi demantellamentu ne’e, ita lori sai tiha sasan arma militár sira ne’ebé maka iha ró ne’e nia laran, nune’e ita bele entrega fali ró ne’e Diresaun Jerál Patrimóniu Estadu atu haree no bele halo fali jestaun,” nian afirma.
Iha prosesu desmantela ne’e, nia dehan mákina no materiál sira hanesan kilat iha ró laran, inklui sasán importante sira seluk hasai ka foti hotu atubele utuliza fali ba nesesidade militár no uza ba treinu no prepara monta fali iha ró ne’ebé Governu Austrália oferese iha 2023.
Komandante ne’e hatutan, ró ne’e atraka kle’ur ona iha portu Dili ne’ebé okupa espasu portu Dili, nune’e halo desmantelamentu hodi loke espasu ka fatin bar ó seluk atu atraka.
Iha tinan 2011, Timor-Leste simu ró patrollamentu tolu ne’e hosi Governu Korea Súl ne’ebé halo parte iha komponente navál F-FDTL no bolu ró tolu (batismu) ho naran Camanasa, Díli no Hera.
Jornalista: Natalino Costa
Editór : Florencio Miranda Ximenes
