MJ husu DTP munisípiu hotu regulariza patrimóniu estadu
BAUCAU, 22 jullu 2022 (TATOLI) – Governu liuhosi Ministériu Justisa (MJ) husu ba Diresaun Servisu Munisipál Terra no Propriedade (DTP) hotu hahú halo levantamentu dadus no regulariza uma no rai estadu ne’ebé durante ne’e utiliza hosi pesoál no kompañia sira.
Ministru Justisa, Tiago Amaral Sarmento esplika, desizaun ne’e foti bazea ba lei númeru 1/2003, lei númeru 13/2013 kona-ba titulariza bem moves, dekretu-lei númeru 09/2014 kona-ba arrendamentu ne’ebé kompleta hotu ona kona-ba norma regulár eziste hosi tinan 2003 to’o VIII Governu Konstitusionál prodús tan norma diploma legál kona-ba rai.
Nune’e Ministru Justisa husu ba Diresaun Terra no Propiedade iha munisípiu hotu atu kontrola atu selu arrendamentu rai no uma estadu tanba tuir ralatóriu relata katak kompañia barak mak seidauk kumpre devér.
“Ministéru Justisa ezije ba diretór terra no propriedade iha kada munisípiu hotu-hotu atubele regulariza ba arrendamentu uma no rai estadu, liuliu ba kompañia lókal, nasionál no internasionál sira-ne’ebé eziste no hala’o negósiu iha munisípiu hotu,” Ministru Justisa hateten iha Vila Antiga, sesta ne’e.
Munisípiu Dili inísia ona rekolla taxa ba kofre estadu hosi rai no uma estadu hamutuk milaun $ 2.1 durante fulan-tolu kotuk no kontinua ona implementa iha munisípiu Viqueque no Cavalima.
Governante ne’e husu ba Diresaun Terra no Propiedade Baucau atu submete revantamentu dadus kona-ba rai no uma estadu inklui relatóriu arrendementu ne’ebé durante ne’e rekolla, liuliu hirak- ne’ebé selebra ona kontratu ho kompañia hotu-hotu kona-ba kumpre sira-nia devér.
Lei mós bandu atu kompañia hirak-ne’ebé iha kontratu arrendementu atu sub-aluger no fa’an tutan ba parte seluk tanba bele hamosu krime fraude fiskál no kontra lei tributária tanba konsidera krime.
“Bainhira regulariza hotu sei hatama taxa ba kofre estadu hodi halo dezenvolvimentu ba área seluk,” Tiago Amaral Sarmento akresenta.
Prezidente Republika promulga dekretu lei kadastrál, tuir planu MJ iha tinan-ne’e sei implementa dekretu-lei refere ne’ebé regulariza atribuisaun sertifikadu na’in ba rai ne’ebé durante okupasaun portugés no indonézia laiha sidadaun, sira seidauk iha sertifikadu.
Objetivu atribuisaun sertifikadu na’in ba rai mak futuru sidadaun sira bele utiliza atu asesu ba kréditu halo negósiu hodi hadi’a ekonomia uma-laran inklui bainhira fa’an rai no uma iha baze legál.
MJ kontinua halo revantamentu kadastrál iha territóriu nasionál tanba antes ne’e projetu refere hala’o de’it iha munisípiu laran la inklui iha postu, suku to’o aldeia nune’e ba sidadaun sira-ne’ebé rejista ona dadus iha SNC no laiha kazu disputa, governu sei konsidera atu atribui sertifikadu.
“Ita espera iha tinan-ne’e buat rua ne’e sei hadi’a di’ak liután, regulariza arrendamentu rai no uma estadu atu ema hotu-hotu kumpre devér,” Tiago Amaral fundamenta.
MJ identifika ona pesoál hamutuk na’in-40 ne’ebé uluk tuir ona formasaun espesiál sukat rai iha Indonézia atu kontinua hikas sukat rai iha postu, suku to’o aldeia to’o finaliza.
Jornalista : Natalino Belo
Editór : Evaristo Soares Martins
