BAUCAU, 22 jullu 2022 (TATOLI) – Ministru Justisa, Tiago Amaral Sarmento, rekoñese malákina fargo utiliza ba trata dokumentu iha kada munisípiu kondisaun aat nune’e kompromente sei rezolve iha fulan-outubru.
Ministru Justisa, Tiago Amaral Sarmento, esplika, mákina refere aat tanba utiliza durante tinan-sanulu laiha manutensaun hanesan iha Bobonaro, Ainaro, Covalima, Dili no Baucau.
“Tinan-ne’e ami halo ona levantementu, ezersísiu buka fundu liuhosi orsamentu jerál estadu, atu arranja fali mákina hosi estranjeiru, prosesu ne’ebé haan tempu kauze fulan-tolu atu rezolve,” Ministru Justisa hateten iha Vila Antiga, Baucau, sesta ne’e.
Governante ne’e argumenta, mákina refere to’o ona tempu aat nune’e presiza halo fornsementu foun tanba halo ona levantamentu, identifikasaun iha kada munisípiu atu sosa fali hodi fasilita funsionáriu sira halo serbisu.
Servisu Notariadu sira iha munisípiu halo antendimentu ba sidadaun sira- ne’ebé trata dokumentu hanesan billete identidade (BI), pasaporte, sertidaun nasimentu, kazamentu no óbitu.
Maske nune’e, ba sidadaun sira-ne’ebé halo dokumentu BI no pasaporte bele submete dadaus iha munisípiu no bele foti iha diresaun nasionál rejistu notariadu, Dili.
“Ekipamentu utiliza kuaze tinan-sanulu laran nunka halo manutensaun no volume atendimentu ba sidadaun sira-ne’ebé trata dokumentu sa’e maka’as entaun presiza kuidadu, maibé ladún iha manutensaun konsekuénsia la funsiona,” Tiago Sarmento akresenta.
Tótal funsionáriu notariadu hamutuk na’in-20 ne’ebé destaka iha Dili no munisípiu hotu no MJ prepara tán funsionáriu na’in-20 ne’ebé sei tuir formasaun atu reforsa iha munisípiu.
Entretantu, Servisu Munisipál Rejistu Notariadu Baucau tótal funsionáriu hamutuk na’in-11 komposta hosi permanente na’in-10, kontratadu na’in- ida ne’ebé tuir dadus kada loron halo atendimentu ba sidadaun hamutuk na’in-200 ne’ebé utiliza komputadór ida inklui mákina emprime ida.
Jornalista : Natalino Belo
Editór : Evaristo Soares Martins
