COVALIMA, 22 jullu 2022 (TATOLI)–Pesoál saúde hosi postu saúde Ogués, Matai no Has-Ain iha Covalima konsidera pagamentu subsídiu liña frente ba pesoál saúde sira hamosu diskriminasaun tanba pagamentu la tuir dekretu-lei ne’ebé Governu aprova liuhosi reuniaun Konsellu Ministru.
“Ami tékniku profisionál saúde hosi postu saúde Ogues, Matai no Has-Ain sente ministériu saúde la valoriza ami-nia servisu no hamosu diskriminasaun ba ami-nia direitu ba servisu ne’ebe ami presta iha situasaun perigu nia-laran, tanba pagamentu la tuir dekretu-lei ne’ebé aprova,” Porta-vós, Zeferina de Jesus, hateten liuhosi konferénsia imprensa, iha postu saúde Ogués, sesta ne’e.
Razaun Governu liuhosi Ministériu Saúde hamosu diskriminasaun tanba haree ba valor pagamentu subsídiu remuneratóriu ba pesoál limpeza no pesoál seguransa boot-liu hosi tékniku profisionál saúde tanba sira hetan valór orsamentu $2900.
Bazea pagamentu ne’ebé mak transfere ona ba konta bankaria ida-idak katak pagamentu ba enfermeiru hetan valór orsamentu $3700 maibé realidade pagamentu hetan de’it $960, ba Parteira hetan $3600 no realidade bele hetan de’it $600, Pagamentu ba Farmasista hetan $3800, no realidade bele hetan de’it $1000 no médiku jerál Mediku jerál hetan de’it $800.
Tuir dekretu-lei hosi Governu númeru 17/2020, 30 agostu, ne’ebé halo segundu alterasaun hosi Konsellu Ministru hodi deklara katak “O Conselho de Ministros aprovou a segunda alteração ao Decreto-Lei n.o 17/2020, de 30 de abril, que cria um suplemento remuneratório para os funcionários, agentes e trabalhadores da administração pública que prestem a respetiva atividade profissional nos serviços de prevenção ou controlo da COVID-19, ou em condições de direta exposição ao vírus SARS-CoV-2.”
Ho nune’e, Governu prepara subsídiu remuneratóriu ba servisu liña frente sira inklui mós pesoál saúde sira hola parte iha servisu ida-ne’e ho valór suplementu remuneratóriu tuir kategoria sira hanesan ba pesoál saúde servisu administrasaun kada-loron sei hetan $15, tékniku profisionál saúde Médiku, Emfermeiru/a, Parteira no tékniku aliadu sira kada loron sei hetan $20.00.
Maibé realidade hatudu pagamentu ba ami tékniku hosi profisionál saúde iha postu saúde Ogues, Matai no Has-Ain hetan la tuir katégoria ne’ebé mensiona iha dekretu-lei.
“Ami ezerse ona ami-nia dever husu ba Governu atu trata ami-nia direitu ho justu, labele hamosu diskriminasaun. Ami sei la nonook no sei kontinua ezije nafatin ami-nia direitu to’o hetan solusaun,” nia dehan.
Jornalista : Celestina Teles
Editór : Cancio Ximenes
