SEII triste Bobonaro kontinua rejista kazu insestu
BOBONARO, 22 jullu 2022 (TATOLI) – Sekretária Estadu Igualdade no Inkluzaun (SEII), Maria do Rosário Fátima Correia, sente triste tanba munisípiu Bobonaro kontinua rejista kazu insestu hasoru labarik feto minoridade.
Maria informa asuntu ne’e iha serimónia inaugurasaun edifísiu própriu Polísia Nasionál Timor-Leste, Unidade Ema Vulnerável (VPU) munisípiu Bobonaro, sesta ne’e.
Notísia relevante: FOKUPERS no SEII komemora loron implementasaun lei konta violénsia ba dala-XII
Ezekutiva ne’e hato’o sentimentu triste ne’e tanba simu informasaun hosi vítima sira-ne’ebé asegura hela iha edifísiu FOKUPERS uma-mahon Maria-Tapo, suku Ritabou, postu administrativu Maliana.
“Ha’u sentre triste ba informasaun ne’ebé ha’u rona munisípiu Bobonaro nafatin akontese kazu insestu ne’ebé mak aas tebes, aman halo ba nia-oan rasik, labarik minoridade tinan 15, nia hetan abuzu seksuál hosi nia aman to’o hetan labarik rua, ida moris tinan ida ona, ida sei hela iha nia knotak, la’ós ida-ne’e de’it, maibe iha balun maun halo ba ninia feto rasik, ne’e duni ita triste tebes ho situasaun ida-ne’e,” nia hateten.
Nune’e nia apela ba entidade hotu-hotu iha munisípiu Bobonaro, xefe suku, lia-na’in sira atu buka meiu no estratéjia oinoin hamutuk ho parseiru atubele redús no elimina siklu violénsia ne’ebé akotese iha munisípu ne’e.
“Ami husu igreja atu nafatin omília ruma karaik nafatin hateten, violénsia kontra feto no labarik feto ne’e krime hanesan kazu insestu, ita hotu triste tanba hanesan aman ida hahoris tiha nia oan, depois nia komete fali. Ida-ne’e ita la simu, tanba labarik ne’e loloos uza nia direitu atu ba eskola, maibé hetan fali sofrementu hosi aman rasik,” nia lamenta.
Sekretária Estadu Igualdade no Inkluzaun ne’e apela ba Polísia Nasionál Timor-Leste atu orienta membru sira sosializa tama suku no aldeia tanba durante ne’e vítima barak afetadu kazu hirak ne’e la konsege hato’o keisa tanba laiha informasasun, inklui muda ema-nia konsiénsia atu hadomi nia oan rasik.
“Ha’u lakohi ba oin atu rona tán kazu ne’e, para deit ona ho alin oan ida-ne’e, ba oin ita serbisu hamutuk atu redús insestu ne’ebé buras iha munisípiu Bobonaro,” nia tenik.
Notísia relevante: PNTL-VPU Bobonaro iha ona edifísiu própriu
Jornalista : Sérgio da Cruz
Editór : Evaristo Soares Martins
