DILI,22 jullu 2022 (TATOLI)– Estadu Unidu Amérika (EUA), liuhusi nia-ajensia Internasionál Dezenvolvimentu (USAID, sigla Inglés), sesta ne’e, anúnsia ona doasaun adisionál $400.000 ba Fundu Nasaun Unida ba Labarik (UNICEF, sigla Inglés) ba espansaun apoiu konjunta nasionál Timor-Leste atu hatan ba COVID-19.
Anúnsiu ne’e fó sai husi Diretora Misaun USAID, Zema Semunegus, no Enkaregadu Reprezentante país UNICEF, Emmanuelle Collet, iha ámbitu selebrasaun Loron Nasionál Saúde iha munisípiu Ainaro.
Doasaun $400.000 ne’e sei ajuda espande hela ona apoiu intervensaun sira inkluindu kontinuasaun servisu esensiál maternál, neonatál no infantil iha país laran tomak, kampaña vasinasaun COVID-19 ba pupolasaun ilejivel sira no hadiak prevensaun infesaun no kontrolu adisionál iha sentru saúde komunitaria (CHC sigla Inglés) sira.
“Ohin loron, ha’u onra tebes atu anunsia doasaun $400.000 atu apoia asisténsia ba COVID-19 husi povu Amerikanu. To’o ohin loron, USAID fornese ona millaun $6,8 ba UNICEF no USAID-nia atividade sustentabilidade sistema saúde apoia atu hatan COVID-19 iha Timor-Leste,” Diretora Misaun USAID, Zema Semunegus informa iha Nota ne’ebé TATOLI asesu ohin.
Finansiamentu ne’e foka liubá komunikasaun risku no envolvimentu komunidade, prevensaun infesaun no kontrolu no espansaun kapasidade bee no saneamentu iha komunidade sira ho risku aas. Esforsu krítiku sira seluk inklui fortalesimentu kolesaun no análiza dadus hodi mellora hatan jerál emerjensia ba COVID-19. Finasiamentu ne’e mós apoia kontinuasaun servisu esensiál saúde maternál, neonatal no infantil iha país laran tomak.
“Finansiamentu ne’e mós espande kampaña vasinasaun COVID-19 ba populasaun ilejivel sira, hadiak prevensaun no kontrolu infesaun iha sentru saúde komunitaria balun,” Diretora ne’e afirma.
Hahú husi 2020, USAID no UNICEF servisu hamutuk ona ho Ministériu Saúde kona-ba melloramentu fasilidade bee, saneamentu no ijíene (BESI) sira iha sentru saúde komunitaria 30 iha munisípiu lima no konsielizasaun kona-bá prevensaun COVID-19 no implementasaun vasina, inklui liuhusi implementasaun envolvimentu koordenadór kumunitaria sira iha munisípiu ida-idak.
USAID ho UNICEF mós fornese pakote prevensaun kontrolu infesaun (IPC, sigla Inglés) iha sentru saúde 15 atu hala’o hela melloramentu fasilidade bee, saneamentu no ijíene iha Sentru Saúde Komunitaria 13 iha munisípiu-lima.
Iha fatin hanesan, Enkaregadu Reprezentante UNICEF, Emmanuelle Collet, informa asaun konjunta sira mak xave atu mantein labarik no família sira seguru husi COVID-19 no moras sira seluk.
“Ami nia asaun konjunta sira mak xave atu matein labarik no familia sira seguru husi COVID-19 no moras sira seluk no iha tempu hanesan fortalese sistema saúde atubele hasoru krize ne’e ho diak no hatan ba populasaun Timor-Leste nia nesesidade sira, partikularmente feto no labarik sira,” Emmanuelle Collet akresenta.
Entretantu, Minsitra Saúde, Odete Maria Freitas Belo, hateten apoiu fornese ona husi USAID ho UNICEF mak esforsu hatan ba COVID-19 ne’ebé krítiku ajuda prevene propagasaun COVID-19, trata ema sira infetadu hosi vírus no garante kontinuasaun servisu saúde esensiál sira, liuhusi mantein profisionál saúde sira seguru durante pandemia.
Ho finansiamentu ne’e, totál kontribuisaun ba UNICEF atu hatan ba COVID-19 iha Timor-Leste to’o ohin loron hamutuk millaun $2,9, ba faze haat hahú husi $500.000 iha 2020, millaun $1,5 iha 2021, $500.000 iha fulan Maiu 2022 no $400.000 iha fulan-jullu 2022.
Jornalista : Felicidade Ximenes
Editór : Florencio Miranda Ximenes
