DILI, 23 jullu 2022 (TATOLI)-Organizasaun Ikatan Kera Sakti-Putera Timor-Leste (IKS-PTL), sábadu ne’e realiza formasaun espirituál, edukasaun no sidadania ba treinadór na’in-66.
Sekretáriu Estadu Juventude no Desportu (SEJD), Abrão ‘Nokosiku’ Saldanha, hato’o parabéns ba estrutura IKS-PTL, ne’ebé mak simu diretiva Estadu nian, hodi hahú formasaun ba treinadór 66.
“Iha Governu nia polítika reativa arte-marsiál , nia objetivu ida mak hamutuk ho ita-boot sira-nia organizasaun ajuda dezenvolve joven sira-ne’ebé ita-boot sira halibur. Tanba, sira timoroan, timor nia oan no timor nia joven sira, labele loron kalan sira mak grupu ida aat de’it iha sosiedade,” Abrão ‘Nokosiku’ Saldanha hateten bainhira loke formasaun espiritualidade, edukasaun no sidadania, iha salaun Hotel Lúz Clarita, sábadu ne’e.
“Entaun, saida mak Governu hakarak halo, reativa ita-boot sira-nia organizasaun hamutuk ho ita-boot sira-nia organizasaun atu eduka timoroan sira ne’ebé prátika iha ita-boot sira-nia organizasaun, ida-ne’e mak intensaun dahuluk hosi Governu,” nia dehan.
Daruak, intensaun ida hosi poténsia tomak ne’ebé organizasaun sira iha Governu haree organizasaun arte- marsiál hanesan parseiru dezenvolvimentu.
“Oinsá mak bele aproveita ita-boot sira-nia poténsia rekursu sira-ne’ebé iha organizasaun atu dudu ba dezenvolvimentu nasionál, iha aspeitu sosiál, ekonómika no kulturál iha ita-nia rain,” nia afirma.
Agora dadaun, atu to’o objetivu ida ajuda kontribui ba sidadaun sira nian, ida mak iha instrusaun KRAM ninian, diretiva ne’ebé hasai husu atu formadór sira tenke iha sertifikadu formasaun, tanba nia tenke iha kapasidade atu forma ema.
“Tanba, iha ita-boot sira-nia liman estadu no komunidade entrega sira-nia oan sira atu forma, atu sai oinsá iha ita-boot sira nia liman. Ita-boot sira bele treinu bele semo dala rua, dala tolu, dala hitu la tún de’it rai, maibé sei la iha kapasidade atu treina ema nia oan lalika, para sai fali kriminozu iha ema nia bairu-bairu labele. Nune’e mós ita-boot sira bele iha ilmu, maibé sei la iha kapasidade atu forma ema nia oan,” governante ne’e fó hanoin.
Tanba ne’e mak Governu, introdúz tenke iha formasaun ba treinadór sira. Naturálmente iha komponente haat mak iha arte-marsiál, ida mak jinástika, arte kombate, espiritualidade no rituál.
Prezidente IKS-PTL, Silvestre Xavier Sufa, akresenta IKS hahú harii iha timor 1996, bainhira harii iha timor IKS la’o di’ak, hosi ne’e loron ba loron IKS la’o no aumenta ema nafatin.
“Kuantidade ne’e ita bele dehan barak, maibé agora daudaun IKS hanoin atu haree ba kualidade. Kualidade mak ohin tuir IKS nia programa ne’e primeira vez ba formasaun nasionál. Formasaun nasionál ida-ne’e formasaun ba treinadór sira, tanba, atu sai treinadór tenke hetan formasaun,” nia dehan.
Entaun, matéria formasaun ba treinadór sira mak ko’alia kona-ba sidadania, valór kulturál, patriotismu, nasionalismu no matéria seluk kona-ba téknika IKS-PTL.
“Ho matéria ne’e atu prepara treinadór sira, hosi ne’e sira tenke domina matéria. Tanba, bainhira treinadór ida kuandu nia kompriende kona-ba sidadania, kompriende nasionalismu, patriotismu, filozofia organizasaun, prinsípiu organizasauj, valór kulturál timor nian, ida-ne’e ha’u fiar katak ita sei hamenus konflitu,” Prezidente IKS-PTL ne’e afirma.
Entretantu, treinadór partisipa iha formasaun ne’e hamutuk 66, ne’ebé mai hosi munisípiu 13. Enkuantu membru Kera Sakti dadaun iha Timor-Leste hamutuk rihun 21.
Jornalista : Nelia Fernandes
Editór : Evaristo Soares
