HEADLINE, OÉ-CUSSE (RAEOA)

Komunidade Bene-Ufe husu hapara konstrusaun UPF Citrana

Komunidade Bene-Ufe husu hapara konstrusaun UPF Citrana

Prosesu konstrusaun postu integradu UPF Citrana Oe-Cusse, Imajen Tatoli/ Abílio Elo Nini.

OÉ-CUSSE, 22 jullu  2022 (TATOLI) – Komunidade sira iha suku Bene-Ufe, sub-rejiaun Nítibe, Rejiaun Administrativa Espesiál Oé-Cusse Ambeno (RAEOA), husu Governu atu hapara provizóriu konstrusaun postu integradu Unidade Patrollamentu Fronteira (UPF) Citrana tanba konstrusaun ne’e la’os konstrui iha liña oin froneira nian no Naktuka disputa hela.

“Postu UPF iha Citrana ne’e, maibé tuir ami-nia haree sekuandu ita tau projetu tenki iha liña fronteira, agora rai senketa Naktuka seidauk rezolve, depois postu ne’e harii fali iha laran mai, maibé komunidade iha fali liña fronteira, signifika polísia iha kotuk komunidade mak iha oin fali, ami konkorda fatin ne’e di’ak maibé la’ós iha fronteira loloos, ami sujere sei bele Governu rezolve uluk Naktuka tanba agora sei disputa hela,” veteranu Francisco Jorge de Carvalho, ko’alia iha lansamentu programa Naroman ba Suku  iha suku Bene-Ufe, Oé-Cusse, sesta ne’e.

Nune’e, nia sujere hapara provizóriu projetu UPF iha Citrana tanba rai Naktuka ne’e sei disputa hela.

Mateus Cau hosi aldeia Manán, suku Bene-Ufe, husu Governu rezolve lai rai Naktuka.

“Komunidade iha suku Bene-Ufe maioria ba serbisu iha ne’ebá halo natar no to’os modo, maibé dehan rai ne’e la’ós ita-nian, tanba saida mak husik de’it dehan rai ne’e senketa, ami husu sei bele rezolve ona nune’e ami tuur hakmatek, klaru ladún iha problema maibé ami hakarak kuda buat oinoin maibé sei ta’uk tanba rai ne’e sei iha problema  ho Indonézia,” nia husu.

Hatán ba kestaun ne’e, Ministru ba Asuntu Parlamentár no Komunikasaun sosiál (MAPKomS), Francisco Martins Jerónimo, konsidera kazu ne’e asuntu internasionál sei iha negosiasaun nia laran, agora prezidente repúblika iha ona Jakarta mós koli’a hela asuntu ne’e,

“Importante komunidade mak tenke labele husik fatin ida-ne’e, forsa sira mak bele ba tanba rai ne’e senketa, kuandu sivíl tanba uluk nia avo nia rai halo to’os natar atu haan no hemu iha ne’ebá, ita labele duni sai hosi ne’ebá, maibé prosesu hela de’it 2% maun boot Xanana mak kaer hela, ne’ebé ita hein de’it, iha Oé-Cusse ida mak Naktuka no Bijaesunan,” nia fó hanoin.

Kona-bá atu hapara konstrusaun postu integradu UPF iha Citrana ne’e, nia parte sei komunika ho Vise-Ministru Interiór hodi haree, tanba ne’e projetu Governu sentrál nian.

Entretantu, projetu konstrusaun postu integradu UPF Citrana ezekuta hosi empreza Aprilia Unipesoál,Lda ho valór kontratu $340,903,02, ho númeru kontratu, NCB/087/MI-2021, durasaun servisu hahú iha 15 dezembru 2021, tuir planu sei konklui iha 15 agostu 2022.

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!