DILI, 23 jullu 2022 (TATOLI)-Tenente Jenerál Reformadu, Lere Anan Timur, husu Governu kontrola didi’ak ezisténsia arte-marsiál nune’e kontribui ba estabilidade.
“Ita ukun-aan, ha’u mai haree dehan SH (PSHT) mak kriminozu oho ema, eipa uluk funu ne’e SH mak ba hasoru ha’u, sira fó sira-nia atributu, farda, kamiza, kamizola no xapeu fó hotu ba ha’u, depois kuandu ita ukun dehan sira mak kriminozu fali, entaun ida-ne’e signifika Estadu ne’e tenke rekoñese sira, katak tenke organiza, labele kria arte-marsiál, depois laiha kontrola, ida-ne’e mós ita halo ita-nia joven sira sai vítima fali,” Lere Anan Timur, hateten bainhira sai oradór iha formasaun ispiritualidade, edukasaun no sidadania ba treinadór IKS-PTL iha salaun Hotel Lúz Clarita, sábadu ne’e.
Kona-ba hanesan konselleiru ida ba IKS-PTL, nia parte hanoin katak juventude ne’e la’ós fatuk, la’ós animál, ne’e ema entaun ema ne’e iha konsiénsia morál no étika.
“Ha’u konselleru ba organizasaun hotu-hotu, hanesan organizasaun sagrada família, arte-marsiál Kera Sakti, SH, KORK, Kempo. Ha’u konselleru ba sira hotu. Tanba ha’u sira-nia aman, ida-ne’e mak ha’u hanoin sira la’ós fatuk, sira la’ós animál, sira ema iha morál, iha etika. Ha’u hanoin sira sempre aprende buat-ne’ebé di’ak no buat-ne’ebé aat sira, sempre aprende,” nia dehan.
Kona-ba modelu atu forma joven iha organizasaun, nia dehan, modelu forma joven ne’e tuir modelu timor nian, tuir kultura no tuir tradisaun Timor nian.
“Sé ita tuir fali modelu, hanesan Kera Sakti ohin dehan mai hosi Xina, ita halo tuir fali Xina, ne’e la haan malu ona ho ita-nia realidade entaun problema loro-loron ona. Ita uza tuir ita-nia realidade, uza ita-nia situasaun, uza ita-nia kultura tradisaun, ida-ne’e di’ak, se ita tuir tradisaun ba lisan ema seluk nian, ida ne’e la haan malu,” Lere fó hanoin.
Entretantu, iha loron 26 maiu tinan ne’e, Primeiru Ministru, Taur Matan Ruak, re-abertura organizasaun arte-marsiál hotu, hanesan IKS-PTL, PSHT no KORK, hodi hala’o atividade fila-fali iha Timor-Leste.
Jornalista : Nelia Fernandes
Editór : Evaristo Soares Martins
