DILI, 23 jullu 2022 (TATOLI)-Govenu liuhosi Sekretaria Estadu Formasaun Profisionál no Empregu (SEFOPE), serbisu hamutuk ho Ajénsia Incanto Group, segunda semana oin haruka traballadór timoroan na’in-16 ba serbisu iha Dubai, Uni Emiradu Árabe.
“Ha’u hanoin, ida-ne’e rezultadu hosi partisipasaun Timor-Leste iha Expo Dubai. Hanesan ita hotu hatene, katak bainhira Timor-Leste nia partisipasaun iha Dubai, Koordenadór Jerál lori oportunidade lubuk ida mai timor, oportunidade ida mak empregu atu fó serbisu ba timoroan sira iha Dubai,” Diretór Jerál SEFOPE, Paul Alves, hateten ba jornalista sira iha Salaun Suai Room, Timor Plaza, sábadu ne’e.
Governu liuhosi SEFOPE, Ministériu Negósiu Estranjeiru no Kooperasaun (MNEK), Koordenadór Jerál Dubai no Incanto Group ba halo enkontru ida iha Dubai no Incanto Group asina akordu ida ho kompania Job Globál halo prosesu rekrutamentu ba timoroan atu ba serbisu iha Dubai.
“Altura sira ba halo aprezentasaun, SEFOPE iha nia opozisaun balun ne’ebé atu fó hatene ba Incanto Group ho Job Globál katak bele rektura timoroan sira, maibé ho durasaun tempu ne’ebé determinadu, hanesan ba tinan ida, rua no tolu, tenke fila mai timor hodi dezenvolve fali timor ba metenek ne’ebé sira hetan iha ema-nia rai,” nia dehan.
Maske nune’e, nia aumenta, timoroan sira-ne’ebé atu ba serbisu iha Dubai, la’ós ba serbisu iha área hotu-hotu, maibé iha área importante iha Dubai.
“Serbisu hanesan ba ajuda uma-kain no seluk ita la fó sira ba, só serbisu hanesan ospitalidade. Maibé, agora daudaun sira sei haruka timoroan balun ba uluk sai hanesan pilotu durante tinan rua, nune’e aban bainrua sira hetan esperiénsia ona sira bele fila mai timor,” nia katak.
Diretór Ezekutivu Incanto Group, Joanico Jeronimo, akresenta durante Incanto nia servisu atu haruka timoroan sira ba serbisu iha Dubai, liuhosi serbisu hamutuk entre Incanto, SEFOPE, MNEK no Ministériu Turismu, Komérsiu no Indústria (MTCI).
“Tanba, antes sira ba tenke fó informasaun, liuliu intermu kontratu, hela fatin, transporte, no tikete ba mai, nune’e sira kompriende. Ne’ebé, agora daudaun viza hamutuk 16 mak prontu ona no agora ba oin komesa semana-semana ba hela de’it. Maibé, agora daudaun simbolikamente ita deklara iha públiku ho nia familia tomak no Estadu atu ita entrega sira-nia viza hodi nune’e segunda semana oin sira aranka ba Dubai,” nia dehan.
Nia informa, ba saláriu iha Middle East (Médiu Oriente) hahú ho $350 mínimu kada fulan.
“Ne’ebé, ba fulan ida (traballadór) sei simu $500, tanba hela fatin kompañia selu, transporte kompañia selu no han kompañia selu, entaun $500 ne’e ba traballadór nian loos de’it,” nia dehan.
Entretantu, traballadór timoroan na’in-16 ne’ebé Governu haruka ba serbisu iha Dubai ne’e, sei ba servisu iha área rua, hanesan otél no restaurante.
Jornalista : Nelia Fernandes
Editór : Evaristo Soares
