HEADLINE, NASIONÁL, SEGURANSA

Membru Polísia Baucau na’in-lima hetan asidente tráfegu iha Uailili

Membru Polísia Baucau na’in-lima hetan asidente tráfegu iha Uailili

Karreta PNTL ne’ebé hetan asidente tráfegu iha área Uailili, sábadu (23/7). Imajen/Espesiál

DILI, 24 jullu 2022 (TATOLI)—Membru Komandu Polísia Nasionál Timor-Leste (PNTL), munisípiu Baucau na’in-lima ne’ebé halo viajen ho karreta xapa matríkula 04.RC, hetan asidente tráfegu iha área suku Uailili, postu administrativu Baucau vila, sábadu (23/7), bainhira iha dalan fila rezolve problema iha suku Ualili.

“Hafoin fila hosi ne’ebá, derrepente iha dalan klaran iha área Uailili nian, besik Taman Makam Pahlawan, tanba estrada ne’e kompañia sei halo hela no rai rahun maka’as inklui fatuk de’it, entaun sira atu liu bemo ida iha oin, tanba rai rahun taka no kondutór la haree, entaun  kondutór halai ba xoke tiha morru iha estrada klaran,” Komandante PNTL munisípiu Baucau, Superintendente Xefe, António de Sá, informa ba Agência Tatoli, via telefónika, domingu ne’e.

Notísia relevante: Asidente tráfegu Bucoli rezulta TS lakon vida

Karreta ne’e tula membru Polísia na’in-lima (inklui Komandante Forsa Rezerva na’in-ida) no suspeitu kazu iha Ualili ida.

Asidente ne’e rezulta membru Polísia ida hetan kanek grave no membru haat seluk hetan kanek kama’an.

“Ha’u-nia membru na’in-ida maka hetan kanek grave, tanba nia liman tohar. Horiseik kedan ami trasporta ona ba Hospital Nacional Guidi Valadares (HNGV) hodi halo tratamentu intensivu,” nia akresenta.

Nune’e, Komandu Baucau kontinua halo investigasaun ba asidente tráfegu ne’e.

Jornalista   : Natalino Costa

Editora         : Julia Chatarina

iklan
iklan

Leave a Reply

iklan
error: Content is protected !!