DILI, 25 jullu 2022 (TATOLI)— Hahú hosi fulan outubru 2021 to’o agora, Sentru Hapara Fuma (SHF) konsege fó akonsellamentu ba fumadór na’in-558, hosi númeru ne’e na’in-500-resin mak hapara totál fuma sigarru no na’in-58 sei iha faze akonsellamentu no tratamentu atu hapara mós fuma tabaku.
“Hahú iha fulan-outubru 2021 to’o agora, ami rejista ona fumadór na’in-558, maibé na’in-508 mak konsege hapara fuma tabaku tanba liuhosi prosesu akonselamentu hosi médiku sira. Responsavél Sentru Hapara Fuma (SHF), Médiku Jerál Eldino de Castro Rangel, hateten ba Jornalista sira iha knaar fatin Formoza-Dili, segunda ne’e.
Notísia relevante: Kada Tinan, Fumadór Sira Mate 600.000
Hosi totál fumadór ne’ebé rejistu iha SHF hamutuk 558, kompostu hosi feto 16 no mane na’in-542.
“Sira ne’ebé mak sei halo tratamentu ne’e hamutuk 58 no balun mak hapara tiha fuma, maibé la mai atu follow up tanba distánsia ne’ebé mak dook hanesan huoi munisípiu mak mai entaun sira hahú fuma fila-fali, nune’e ita konsidera tratamentu foun fali ba sira,” nia esplika.
Notísia relevante: Persentajen Fumadór ho Idade Labarik Komesa Tuun iha TL
Médiku sira uza ai-moruk nicotine ho nicotine patch no handyplast hodi fó tratamentu ba fumadór sira, liuliu taka ba isin no aimoruk seluk nata de’it.
“Ami fó tratamentu bazeia ba matandalan hanesan nicotine 2mg no 4mg ne’e fumadór sira sei nata de’it. Liuliu 2mg ne’e ita uza ba sira ne’ebé iha nivél ki’ik ka moderadu no 4mg ba sira ne’ebé mak depedénsia tabaku aas ona,” Médiku ne’e esplika.
Ba ai-moruk nicotine patch no handyplast ne’e, médiku sira sei taka de’it ba fumadór sira nia isin hanesan 7mg, 14mg, no 21mg.
“Ami nia tratamentu ka akonsellamentu ba fumadór sira kuaze uza aimoruk nicotine 4mg ho 21mg tanba paseinte sira ne’e fuma iha nivél depedénsia ne’ebé mak aas,” nia akresenta.
Daudaun ne’e, Sentru Saúde Hapara Fuma konsefe estende tan ona ba iha munisípiu tolu hanesan Liquiça, Ermera,no Ainaro atu fó atendimentu ka akonsellamentu ba komunidade ne’ebé mak hakarak hapara fuma bele asesu iha ne’eba.
Notísia relevante: PN aprova taxa seletivu tabaku hasa’e ba $50
MS lansa sentru hapara fuma prevene moras la hada’et
Jornalista : Felicidade Ximenes
Editór : Florencio Miranda Ximenes
