COVALIMA, EKONOMIA, POLÍTIKA

MAP fó formasaun oinsá hakiak ikan ba grupu agrikultór iha Covalima

MAP fó formasaun oinsá hakiak ikan ba grupu agrikultór iha Covalima

Grupu agrikultór hakiak ikan sira tuir hela formasaun kona-ba oinsá produs ikan nia hahan. Imajen Tatoli/Celestina Teles.

COVALIMA, 25 jullu 2022 (TATOLI)—Ministériu Agrikultura no Peska liuhosi Dirasaun Jerál Peska fó formasaun kona-ba prodús hahan ba ikan no oinsá hakiak ikan ho di’ak ba grupu agrikultór sira-ne’ebé hakiak ikan iha munisípiu Covalima.

“Ohin, ita halo formasaun ba agrikultór hakiak ikan no oinsá mak bele fó formasaun kona-ba hakiak ikan uza materiál prima iha fatin ida-ne’e. Ita hotu hatene ita-nia problema boot mak hahan ikan nian tanba hahan ikan ne’e presu ne’ebé karun,” Diretór Jerál Peska Minitériu Agrikultura no Peska, Acacio Guterres, hateten ba jornalista sira iha salaun Centru Comunidade Covalima, bairru Kampung Baru, segunda ne’e.

Durante ne’e, sira hakiak ikan maibé la fó hahan ba ikan. entaun ho formasaun ida-ne’e oinsá mak sira bele prodús hahan ba ikan rasik, nune’e sira bele fó ikan ne’ebé sira hakiak no Governu sei entregra ekipamentu atu prodús hahan ba ikan.

Formasaun ne’e hala’o durante loron lima ne’ebé hahú hosi loron 25 to’o 29 jullu 2022, no hafoin finaliza formasaun ne’e tékniku sira sei fó asisténsia hodi kontrola no sei fó apoiu fini ikan ba agrikultór sira.

“Governu prodús fini ikan iha munisípiu Manufahi, Ermera no ba futuru ita-mós iha planu atu estabelese sentru produsaun fini ikan iha Suai, nune’e komuniade bele halo produsaun fini ho di’ak liután,” nia dehan.

Durante ne’e, grupu agrikultór sira hakiak ikan ne’e sira hatudu ona nia rezultadu no kolleta ona, nune’e sira faan hodi hetan rendimentu.

Tuir dadus, postu administrativu sira-ne’ebé hakiak ikan barak iha postu administrativu Fohorem, Governu estabelese iha suku Laktos ho Fatululik, nune’e estabelese kolam hamutuk-150.

Administradór munisípiu Covalima, Francisco de Andrade, hateten formasaun ida-ne’e ba grupu agrikultór sira-ne’ebé hakiak ikan atu bele prodús hahan ba ikan, nune’e bele fó ba ikan ne’ebé sira hakiak ne’e.

“Ohin, sira-hosi nasionál mai halo formasaun ba grupu agrikultór sira-ne’ebé haki’ak ikan, atu sira bele haki’ak ikan ho di’ak no prodús hahan ba ikan rasik. Tanba ita sosa hahan ba ikan ne’e karun liu tanba kilograma ida sentavus 2,50,” nia dehan.

Autoridade munisipál ne’e mós enkoraja grupu agrikultór sira atu tuir formasaun ho seriedade, nune’e hafoin tuir formasaun bele implementa saida mak sira hetan ona, nune’e bele buka moris rasik.

Formasaun ne’e partisipa hosi administradór Covalima no administradór postu administrativu Suai, grupu agrikultór hakiak ikan sira-ne’ebé maihosi postu administrativu Fohorem, Fatululik, Tilomar no Suai hamutuk ema na’in-30.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!